ShQO-da kópbalaly jáne az qamtylǵan otbasylar úshin 1,1 myń baspana salynady
Jıynǵa oblys ákimi Danıal Ahmetov pen qalalar men aýdandardyń ákimderi qatysty.
Ótken 2020 jyly Shyǵys Qazaqstan oblysy qurylys qarqynyn údetti. 1 myńnan astam kópbalaly jáne az qamtylǵan otbasy baspanaly boldy. Turǵyn úı, áleýmettik nysandar salynyp, joldar jóndeldi. Bıylǵy jyly bul jumystardy ári qaraı damytý kózdelgen.
Óńir basshysy atap ótkendeı, bıyl ShQO-da qarjylandyrýdyń barlyq kózderi esebinen 912,5 myń sharshy metr turǵyn úı salý josparlanyp otyr. Onyń ishinde, jeke ınvestorlar esebinen kópbalaly jáne az qamtylǵan otbasylar úshin 1 143 páterli 759 bir qabatty úı salynady. Burynǵy aýdan ortalyqtarynda 72 úı boı kóteredi.
«Burynǵy aýdan ortalyqtaryna basa nazar aýdarý qajet. Qalalar men aýdandar ákimderine bir apta ishinde usynys engizýdi tapsyramyn. Barlyǵy jumys ýaqytymen tıisti sapada oryndalýy kerek. Sondaı – aq, barlyq ákimder aýmaqty abattandyrý jáne ınjenerlik-kommýnıkatsııalyq ınfraqurylym ótkizý boıynsha jumystardyń oryndalý kestesin usynýy tıis», - dep atap ótti Danıal Ahmetov.
Oblys ákimi qurylys kompanııalarynyń básekeli orta jaǵdaıynda jumys isteýi jumys sapasyn artatynyn aıtty. Eger árbir aýdan jeke ınvestorlar esebinen nesıelik turǵyn úı salsa, áleýmettik turǵyn úı qurylysyna arnalǵan jospardan joǵary kvota alýǵa múmkindigi bar.
Aıta keteıik, bıyl áleýmettik-mádenı maqsattaǵy 9 nysannyń qurylysy jalǵasyn tabady. Semeı qalasynyń Stepnoı kentinde 300 oryndyq mektep, Qaınar aýylynda zamanaýı dene shynyqtyrý-saýyqtyrý kesheni salynady. Taǵy 5 dene shynyqtyrý-saýyqtyrý kesheni Bozanbaı, Tavrııa, Marqakól, Aqsýat aýyldarynda, sondaı-aq Serebrıansk qalasynda paıda bolady. Al júzý basseıni bar dene shynyqtyrý-saýyqtyrý kesheni Borodýlıha aýdanynda boı kóteredi. Sondaı-aq, Samar aýylynda jáne Aıagóz qalasynda júzý basseınderiniń qurylysy júrmek. Óskemendegi 244 oryndyq 9 qabatty jataqhananyń qurylysy jalǵasady.