ShQO-da kópbalaly otbasylarǵa 200-den astam úı salynýda
ÓSKEMEN. QazAqparat – Shyǵys Qazaqstan oblysynda 200-den astam eki páterli turǵyn úı salynýda, dep habarlaıdy QazAqparat tilshisi.
Óńir basshysy Danıal Ahmetov qala, aýdan ákimderimen turǵyn úı qurylysy boıynsha selektorlyq keńes ótkizdi. Shara barysynda oblysta kópbalaly jáne az qamtylǵan otbasylarǵa kómek kórsetý, onyń ishinde baspanamen qamtamasyz etý boıynsha belsendi jumys júrgizilip jatqandyǵy aıtyldy. Qazirgi ýaqytta jekemenshik qurylys kompanııalarynyń esebine jalpy aýdany 37,5 myń sharshy metrdi quraıtyn 209 eki páterli turǵyn úıdiń qurylysy jalǵasýda. Bul úıler kópbalaly analarǵa satyp alynbaq.
«Búgingi kúni osy sanattaǵylar úshin jalpy aýdany 12,7 myń sharshy metrlik 144 páterli 78 turǵyn úı paıdalanýǵa berilgen. Zaısan aýdanynda kópbalaly otbasylarǵa arnalǵan segiz úı salyndy. Qosymsha taǵy segiz úıdiń qurylysy 1 jeltoqsanǵa deıin aıaqtalady. Sonymen qatar kelesi jyly 50 úıdiń qurylysy júrgizilmek. Abaı aýdanynda salynyp jatqan 13 úıdiń qurylysy qarasha aıynyń sońynda támámdalady», - deıdi ShQO ákimi.
Ótken jyly óńirde 563 kópbalaly otbasy qonys toıyn toılaǵan. 2020 jyldyń aıaǵyna deıin 1047 otbasy baspanaly bolady. Jyl basynan beri 379 otbasy óz úıiniń kiltin aldy. Jospar boıynsha bıyl 668 az qamtylǵan jáne kópbalaly otbasy turǵyn úımen qamtamasyz etilmek. Osy ýaqytta oblystyń iri qalalarynda 400-den astam, al aýdandarda 500-den astam otbasyǵa turǵyn úı berildi.
