ShQO-da kópbalaly otbasylardyń bıznes bastaýyna kepilsiz nesıe beriledi

SEMEI. QazAqparat - Aýylda turatyn kópbalaly ata-analar úshin Shyǵys Qazaqstanda arnaıy «Asyl ana» baǵdarlamasy jasaldy. Onyń negizinde bıznes bastaýǵa nıetti januıaǵa kepilsiz, 4 paıyzdyq ústememen nesıe beriledi. Bul týraly «Nur Otan» partııasy ShQOF baspasóz qyzmetine silteme jasap QazAqparat habarlaıdy.

Aıta keteıik, búginde Shyǵys Qazaqstan oblysy partııanyń «Baqytty otbasy» jobasy aıasynda az qamtylǵan jáne kópbalaly januıalardy keshendi qoldaýǵa arnalǵan jeke baǵdarlamasyn ázirlegen edi. Osy rette aımaqta erekshe kútimdegi jáne kópbalaly otbasyndaǵy 3218 bala balabaqshaǵa tegin barady. Ol úshin oblystyq bıýdjetten 266,4 mln teńge bólinip otyr. Budan bólek, «Jappaı oqytý» qorynan 28 700 jetkinshekke mektep formasyn alý úshin 500 mln teńge jumsalmaq. Al stýdent balalar bolsa, kolledjde tegin bilim alady. Qosymsha shákirtaqy jáne ystyq tamaqpen qamtylady.

«Prezıdentimiz qoıǵan mindetke saı, biz ár otbasynyń ál-aýqatyn kóterý úshin eńbek etýimiz kerek. Shyǵys Qazaqstan oblysynyń bıýdjeti árkez áleýmettiń áleýetin arttyrýǵa baǵyttalǵan. Jyl saıyn bul salaǵa quıylatyn qarajat 53% nemese 230 mlrd teńgeni quraıdy. Elbasy sondaı-aq, áleýmettik saıasat teń dárejede bolýy kerektigin, ıaǵnı, buqara arasynda jalqaýlyq sııaqty jat ádetti týǵyzbaýy tıis ekendigin basa aıtty. Memlekettiń basty maqsaty - azamattardy eńbekke baýlý. Osyǵan oraı, «Nátıjeli jumyspen qamtý» baǵdarlamasy arqyly basymdyq óz isin ashýǵa nıetti kópbalaly otbasylarǵa beriledi. Sonymen qatar, «Asyl ana» aımaqtyq jobasy da aýyldaǵy januıalar úshin úlken qoldaý bolmaq. Bul maqsatqa 250 mln teńge qarastyryldy. Jartysy jergilikti bıýdjetten, qalǵan bóligin «Atameken» UKP arqyly tarttyq», - dep atap ótti Danıal Ahmetov.

Partııanyń oblystyq aktıv otyrysyna sondaı-aq, kópbalaly analar da qatysty. Solardyń biri - Zaısan aýdanynyń Qaratal aýylynan kelgen «Altyn alqa ıegeri», jeti balanyń anasy Sáýlesh Abylǵojına. Joldasy ómirden ozǵan soń otbasylyq bıznesti qolǵa alyp, jiger-qaıratyn aıamaı eńbek etti. Búginde jıyrmadan astam adam eńbek etetin «Aqbaı» asyl tuqymdy sharýa qojalyǵyn basqaryp otyr.

«Kópbalaly otbasyndaǵy jaǵdaıdy bir kisideı-aq túsinemin. Memlekettiń olarǵa qoldaý kórsetip jatqany, álbette, qýantady. Ásirese, az qamtylǵan toptaǵylarǵa. Ózim de múmkindigime qaraı kómektesip turamyn. Máselen, ótkende óz aýylymdaǵy kópbalaly januıaǵa baspana alyp berdim. Búgin biz sııaqty ata-analarǵa tómen paıyzben nesıe beretinin estidim. Osy múmkindikti qoldana otyryp, balabaqsha ashsam deımin. Ol - bizdiń aýyl úshin asa qajet tálim-tárbıe shańyraǵy», - deıdi Sáýlesh Abylǵojına.

Áleýmettik qoldaýdy arttyrý jáne turmys sapasyn kóterýge baǵyttalǵan aýqymdy sharalar boıynsha ShQO-da suranysqa ıe mamandyqtarǵa qysqamerzimdi oqytýlar uıymdastyrylady. Sonymen qatar, kóp jáne erekshe balalardy tárbıelep otyrǵan analar úshin áleýmettik jumys oryndary, onyń ishinde úıde qyzmet etý múmkindikteri de qarastyrylyp jatyr. Jalpy aımaqtyq baǵdarlamany júzege asyrý úshin 16,7 mıllıard teńge jumsalmaq.