ShQO-da kópbalaly otbasylardy qoldaýdyń óńirlik baǵdarlamasy daıyndalyp jatyr

ÓSKEMEN. QazAqparat - Danıal Ahmetov el aldyndaǵy esebi kezinde kópbalaly jáne turmysy tómen otbasylardy qoldaýǵa arnalǵan keshendi óńirlik baǵdarlama ázirlenip jatqanyn atady, dep habarlaıdy QazAqparat tilshisi.

Ákimniń aıtýynsha, qysqa merzimde atalmysh sanattaǵy otbasylardy qoldaýdyń tetikteri men qarjy bólý máselesi sheshimin tappaq. Qarjy kózi men mólsheri anyqtalǵannan keıin keshendi baǵdarlama júzege asa bastaıdy.

Óńirlik baǵdarlama tómendegideı jeńildikterdi qamtıdy dep josparlanýda.

Birinshiden, kópbalaly otbasylardyń barlyq balalary balabaqshaǵa tegin baratyn bolady.

«Bul maqsatqa 245 mln teńge bólinedi. Mundaı jeńildik memlekettik te, jeke menshik te balabaqshalarǵa qatysty. Kópbalaly januıalar balabaqshaǵa qatysty barlyq shyǵyndardan bosatylady», - dedi ol.

Ekinshiden, jalpyǵa mindetti oqý qorynyń kapıtaly 500 mln teńgege jetkizilmek. Bul qarjyǵa, birinshi kezekte kópbalaly jáne az qamtylǵan otbasylardyń balalaryna jańa oqý jylynda mektep formasy men qural-jabdyqtary satyp alynady. Buǵan deıin atalmysh maqsatqa bólingen qarjyny qosa eseptegende osy sanatqa enetin ár balany oqý jylyna daıyndaý úshin 22 myń teńgeden bólinip otyr.

Úshinshiden, kópbalaly otbasynan shyqqan stýdentter oqý oryndarynyń shákirtterine 3 mlrd teńge bólindi. Osynyń arqasynda 4 200 bala tamaq pen jol júrý aqysynan bosatylyp, shákirtaqy alatyn bolady.

Tórtinshiden, kópbalaly otbasylarǵa shaǵyn nesıe usyný maqsatynda oblys bıýdjetinen 337 mln teńge bólinetin bolady. Bul qarjy kópbalaly otbasylarǵa memleket atynan 85 paıyz nesıe kepildigin usynýǵa jumsalady.

Besinshiden, bıznes ıdeıalardy júzege asyrý úshin qaıtarymsyz negizde beriletin granttarǵa kópbalaly otbasylar da ótinim bere alady. Grant kólemi 252,5 myń teńge shamasynda. Qazirdiń ózinde bul jobaǵa 67,7 mln teńge bólinip, 268 joba qoldaýǵa ıe bolǵan.

Altynshydan, aýyldaǵy kópbalaly otbasylarǵa shaǵyn nesıeniń paıyzdyq ústemeaqysyn sýbsıdııalaý, maldy kepildikke qoıý aıasyn keńeıtý turǵysynan kómek berilmek.

Jetinshiden, 12 aqpan men 12 naýryz aralyǵynda júretin «Salamatty ana men bala» atty aktsııa aıasynda kópbalaly analar men otbasy músheleri ózi tirkelgen emhanada tegin qaralyp, dıagnostıkadan ótip, dáriger keńesin kedrgisiz alady. Mundaı aktsıııalardy jylyna eki ret ótkizip turý josparlanyp otyr.

«Osy aıtqan baǵyttardyń bári bir keshendi baǵdarlama toptasady. Onyń naqty sulbasy bir aıdyń ishinde daıyn bolýy tıis. Barlyq usynystar eskerilip, qarjy kólemi eseptelip, oblystyq máslıhatqa ótedi. Mysaly, kópbalaly otbasylarǵa sýarmaly jerdi jeńildikpen berý tetigi bar. Osynyń barlyǵyna qarjy qansha mólsherde bólinetinin depýtattarmen birlesip bekitemiz» - dedi Danıal Ahmetov.