ShQO-da kópbalaly analar #Abai175 chellendjine qatysty
Oblys ákimdiginiń baspasóz qyzmetinen habarlaǵandaı, aımaq basshysy Danıal Ahmetovtiń Altaı aýdanyna jumys sapary barysynda kópbalaly analar Abaı óleńderin oqyp, estafetany Katonqaraı aýdanyna joldaǵan.
Aıta keterligi, dál osy Altaı aýdanynda aımaq deńgeıinde birinshi bolyp «Altaı marjandary» atty kópbalaly analar klýby qurylǵan edi. Osy klýbtyń kómegimen olar óz josparyn júzege asyryp, óńirdiń qoǵamdyq ómirine atsalysa alady. Belsendilerdiń basty urany – «Biz birgemiz»!
Jalpy, #Abai175 chellendjine qańtar aıynyń aıaǵynda Danıal Ahmetovtiń ózi ún qosyp, estafetany Tatarstan Prezıdentine joldaǵan edi. Óz kezeginde Rýstam Mınnıhanov uly aqynnyń «Men jazbaımyn óleńdi ermek úshin» óleńin oqyp bergen.
Eske sala ketsek, Láılim-Shyraq esimdi 9 jastaǵy oqýshynyń estafetasyn Prezıdent ilip áketkeli Abaıdyń óleńi men qara sózin oqý dástúri búginde jarty álemge tarap ketti. Arysy AQSh, Frantsııa men Japonııanyń, berisi túrki tildes elderdiń ókilderi ún qosqan chellendj ártúrli sıpat alyp, dúnıeniń ár túkpirindegi nıettes halyqtardyń qoldaýyna ıe bolyp jatyr. Láılim-Shyraq Abaı óleńderinen úzindi oqyp, estafetany jalǵastyrýdy Memleket basshysyna joldady.
Oqýshynyń bul usynysyn zor qýanyshpen qabyldap, aqynnyń jastardy bilim men ǵylymǵa shaqyratyn «Ǵylym tappaı maqtanba» atty óleńinen úzindi oqyp, jaýap berdi.
Osylaısha, aktsııaǵa aqyndar men ánshiler, álemdik deńgeıdegi akterlar men túrli elderdiń elshileri ilip áketken bolatyn.
QR Prezıdenti Qasym-Jomart Toqaev Abaıdyń 175 jyldyq mereıtoıyn merekeleý týraly Jarlyqqa byltyr qol qoıǵan bolatyn.
