ShQO-da Qońyr áýlıe úńgiriniń aýmaǵy abattandyrylady

ÓSKEMEN. QazAqparat - QR Prezıdenti bastamashylyq etken «Rýhanı jańǵyrý» baǵdarlamasyn óńirde júzege asyrý aıasynda Shyǵys Qazaqstanda birneshe ondaǵan joba jasaldy, dep habarlaıdy «QazAqparat» oblys ákiminiń baspasóz qyzmetine silteme jasap.

Olardyń arasynda - úshtildilik, «Týǵan jer», kıeli oryndar bar.

«Biz tarıhı muramyzdy saqtap qalýymyz kerek. Biz Abaı aýdanyndaǵy kıeli oryndardyń biri - Qońyr áýlıe úńgiriniń jobalyq-smetalyq qujattamasyn daıyndap jatyrmyz. Qajylyqqa baratyn myńdaǵan adam jerasty kóline barýda. Meniń tapsyrmam boıynsha, adamdardyń esh qıyndyqsyz kıeli orynǵa túsýi jáne demalýy úshin aýmaqty abattandyrý boıynsha jumystar júrgizilýde», - dedi óńir basshysy Danıal Ahmetov ákimdikte ótken jıynda.

Taıaý ýaqytta «Rýhanı jańǵyrý» óńirlik baǵdarlamasynyń tanystyrylymy ótedi.

Eske salaıyq, ShQO Abaı aýdanyndaǵy Aqtas taýynda Qońyr áýlıe ornalasqan. Úńgirde sýy emdik qasıetke ıe kól bar. El arasynda úńgirdiń shyǵý tarıhy týraly túrli ańyzdar men mıfter saqtalǵan. Bir ańyzda tereńdigi on bes metrlik kólde Shyńǵyshannyń tabytyna alyp baratyn jasyryn esik ornalasqany baıandalady.

Shyndyqpen janasatyn taǵy bir ańyz boıynsha, munda jońǵarlarmen soǵysqan batyrlar qantógisten keıin alǵan jaraqattaryn emdeý úshin osynda kelip, jaraqattaryn emdeıtin kórinedi.