ShQO-da kontrabandalyq jolmen tasymaldanǵan 500 keli balyq tárkilendi
ÓSKEMEN. QazAqparat – Shyǵys Qazaqstan oblysynyń polıtseıleri kontrabandalyq jolmen tasymaldanǵan 500 keli balyqty tárkiledi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, «Brakoner» jedel aldyn alý sharasyn júrgizý kezinde tártip saqshylary Kúrshim aýylynda «GAZ-33021» markaly avtokólikti toqtatqan. Tekserý barysynda Óskemen qalasynyń 37 jastaǵy turǵynynyń zańsyz balyq tasymaldaǵany anyqtaldy.
«Kóliktiń júk salǵyshynan kileń shortan balyǵy tabylǵan. Tárkilengen balyqtyń jalpy salmaǵy 504 kelini qurady. Osynyń saldarynan keltirilgen zalal mólsheri 2,7 mıllıon teńgeden asqan», - dedi ShQO PD bastyǵy Saǵat Mádıev.
Júrgizýshi qosymsha tergeý júrgizý úshin polıtsııa bólimine jetkizildi. Atalǵan fakti Qazaqstan Respýblıkasy Qylmystyq kodeksiniń 335 baby 1 bóligi boıynsha sotqa deıingi tergeýdiń biryńǵaı tizilimine engizilgen.
