ShQO-da Konstıtýtsııa kúnine oraı ótken vıktorına jeńimpazyna grant berildi

ÓSKEMEN. QazAqparat – S.Amanjolov atyndaǵy Shyǵys Qazaqstan ýnıversıtetinde Konstıtýtsııa kúnine oraı uıymdastyrylǵan onlaın-vıktorınanyń jeńimpazyna arnaıy grant berildi, dep habarlaıdy QazAqparat tilshisi.

«Táýelsiz Qazaqstannyń Ata Zańy» taqyrybynda onlaın formatta ótken baıqaýǵa «Quqyqtaný» mamandyǵyna qujattaryn tapsyrǵan talapkerler qatysqan. Vıktorına jeńimpazy Aıdana Nurqasynovanyń aıtýynsha, jıyrmadan astam talapker arasynda grant jeńip alý ońaıǵa túsken joq.

«Ata zańymyzdy tolyq zerdelep shyqtym. Baıqaý sharttarynda atap ótilgendeı, suraqtardyń barlyǵy Konstıtýtsııa aıasynda boldy. Joǵary oqý ornynan grant jeńip alǵanyma óte qýanyshtymyn», - deıdi ýnıversıtettiń jańa stýdenti Aıdana Nurqasynova.

Óz kezeginde ýnıversıtet rektory Aıdanaǵa oqýda tabys, zor densaýlyq jáne baqyt tiledi.

Daryndy jastardy anyqtaý jáne áleýmettik-pedagogıkalyq qoldaý bizdiń ýnıversıtetimizdiń mańyzdy mindetteriniń biri. Óıtkeni daryndy stýdentterdiń bolashaǵyna úles qosý – elimizdiń ıgiligi úshin jumys isteıtin bolashaq joǵary kásibı mamandar daıyndaýdyń kepili. Sondyqtan S.Amanjolov atyndaǵy ShQÝ bizdiń óńirdiń ǵana emes, jalpy elimizdiń daryndy balalaryn qoldaıdy, - dedi ýnıversıtet rektory Muhtar Tólegen.