ShQO-da kóne sánbı taıpasynyń molalary tabyldy
ÓSKEMEN. KAZINFORM – Shyǵys Qazaqstan oblysy Katonqaraǵaı aýdanynda kóne sánbı taıpasynyń molalary tabyldy.
Á.H.Marǵulan atyndaǵy Arheologııa ınstıtýtynan usynǵan málimetke súıensek, Katonqaraǵaı aýdanyndaǵy Arshaty aýylynan 11 shaqyrym qashyqtyqta ornalasqan Taýtekeli shatqalynda arheologııalyq zertteý jumystary júrgizilgen. Nátıjesinde, I myńjyldyqtyń birinshi jartysymen merzimdeletin sánbı taıpasyna tıesili 13 jerleý-aza tutý kesheni tabylǵan.
«Ortasynda shuńqyry bar molalar tastarmen qorshalǵan. Tereńdigi shamamen bir metr bolatyn mola shuńqyrynda negizinen eresek adamnyń múrdesi, sırek jaǵdaıda balalardy jerlegen. Al eki molaǵa jylqylardy qosa jerlegeni anyqtaldy. Mola ishine qysh ydys jáne jartylaı baǵaly tastardan jasalǵan monshaqtar da qoıylǵan», - delingen aqparatta.
Aıta keteıik, qazba jetekshisi – Á.H.Marǵulan atyndaǵy Arheologııa ınstıtýtynyń jetekshi ǵylymı qyzmetkeri Azat Aıtqalı.
Jazba derekterine sáıkes, sánbıler ǵun ımperııasy ydyraǵannan keıin Ortalyq Azııadaǵy etnomádenı protsesterdiń qalyptasýy men damýynda sheshýshi ról atqarǵan kóshpeli taıpa bolǵan. Olardyń yqpaly aımaqtyń kóshpeli qaýymdastyqtarynyń mádenı jáne saıası damýynyń ártúrli aspektilerine, sonyń ishinde jańa memlekettik qurylymdardyń qalyptasýyna, áskerı dástúrlerdiń damýyna jáne áleýmettik-ekonomıkalyq qurylymdarǵa áser etti.
