ShQO-da kómirdiń sapasy kóptiń kóńilin kúpti etti
ÓSKEMEN. QazAqparat - Jańa jylytý maýsymyna daıarlyq barysyndaǵy alǵashqy 4 aıda Shyǵys Qazaqstanǵa turmystyq qajettilik boıynsha eki ese kóp, al tehnıkalyq qajettilik boıynsha 20 paıyz artyq kómir jetkizilgen. Alaıda kómir sapasynyń máselesi áli de ótkir kúıinde qalyp otyr, dep habarlaıdy QazAqparat tilshisi.
«Júk tasymalynyń» Shyǵys Qazaqstandaǵy bólimshesiniń logıstıka jáne uıymdastyrý bóliminiń bastyǵy Almas Seısemqanov atap ótkendeı, «jańa jylytý maýsymyna daıarlyq barysyndaǵy alǵashqy 4 aıda Júk tasymalynyń Shyǵys Qazaqstandaǵy bólimshesi boıynsha (Semeı aımaǵyn qospaǵanda) óńirge 709,3 myń tonna kómir ákelingen. Naqtyraq aıtqanda, tehnıkalyq qajettilik boıynsha 543,2 myń tonna (ótken jyldyń salystyrmaly kezeńinen qaraǵanda 90,7 myń tonnaǵa kóp), al turmystyq qajettilik boıynsha 166,2 myń tonna kómir (ótken jyldyń salystyrmaly kezeńinen qaraǵanda 87,1 myń tonnaǵa kóp) jetkizilgen».
Temirjolshylardyń málimetine súıensek, tamyzdyń ekinshi onkúndiginen bastap Shyǵys Qazaqstanǵa ortasha eseppen táýligine 48 vagon kómir (ıaǵnı, kúnine 3,3 myń tonna) jetkizilip turǵan. Onyń ishinde Óskemende táýligine 23 vagon keledi. Tamyz boıy óńirge 268,7 myń tonna (turmystyq qajettilikke 80,6 myń tonna) jetkizilgen.
Dese de, kómirdiń sapa máselesi kúnnen-kúnge ótkir bola túsýde. Birneshe kásiporyndardyń, atap aıtqanda JEO, «Vostokenergo» JShS-lardyń kómirge jaýapty «Qarajyra» AQ-na narazylyqtary ósip barady. Sebebi, jetkizilip jatqan vagondardyń ishindegi qur jynys, tastar men iri bólshekterdi memlekettik standarttarǵa saı usaqtaýǵa týra keledi. Osynyń saldarynan kómir ashyq vagondardyń lıýktarynda qystyrylyp, túsirýdiń tehnologııalyq merziminiń 3 saǵattyq tártibinen tys kómir 36 saǵattyń ishinde túsiriledi.
«Osynyń saldaryna biz jartylaı ashyq vagondardy turmystyq kómirdi tolaıym satatyn satýshylarǵa bere almaımyz. Degeleńde 800 ashyq vagonymyz bar, olardyń 425-in ortasha eseppen bir táýlikte tıeý kerek», - deıdi Almas Seısemqanov.
Sonymen qatar, qazirgi tańda áleýmettik kómirdi halyqqa satýǵa baılanysty másele ashyq kúıinde qalyp otyr. Qazirgi jylytý maýsymynda qajettilik mólsheri 25 myń tonna bolsa, suranysty tolyq qanaǵattattandyrý úshin taǵy 12 myń tonna kómir kerek. Keıbir óskemendikter ózderiniń suranysy qanaǵattandyrylǵansha, bir aı ýaqyt kútýge májbúr.
Óskemen qalasynyń soǵys ardagerleri men tyl eńbekkerleri keńesiniń tóraǵasy Sergeı Denıakın halyqty áleýmettik kómirmen qyrkúıektiń ózinde qamtamasyz etip úlgerýge bolatynyn aıtady. Onyń keltirgen málimetine sáıkes, shilde-tamyz aılarynda áleýmettik qorǵaýǵa múddeli halyqtyń bóligine 13,1 myń tonna áleýmettik kómir satylyp qoıǵan. Sergeı Denıakınniń aıtýynsha, bul aıtýly kórsetkish bolyp tabylady.
«Kómir sátti jetkizilip tursa, turmystyq-áleýmettik qajettilik boıynsha kómirge qatysty máseleni qyrkúıekte sheshýge bolady», - deıdi ol.
