ShQO-da komendanttyq saǵat talabyn buzǵan 15 adam jaýapqa tartyldy

ÓSKEMEN. QazAqparat – Shyǵys Qazaqstan oblysynda komendanttyq saǵat talabyn buzǵan 15 adam jaýapqa tartyldy, dep habarlaıdy QazAqparat tilshisi.

ShQO Polıtsııa departamentiniń baspasóz qyzmeti usynǵan sońǵy málimetterge súıensek, oblys boıynsha jaǵdaı turaqty.

«Qazirgi ýaqytta óńirdegi jaǵdaı quqyq qorǵaý organdarynyń baqylaýynda. Polıtseıler kúsheıtilgen rejımde óz qyzmetin jalǵastyryp jatyr. Tótenshe jaǵdaı men lańkestikke qarsy operatsııany ótkizýge baılanysty engizilgen shekteýler saqtalady», - delingen aqparatta.

Búginde aımaq boıynsha ustalǵandar sany 1100-den asady. Onyń ishinde 79-y qamaýǵa alynǵan. Komendanttyq saǵat talabyn buzǵany úshin 15 adam ákimshilik jaýapqa tartyldy.

Esterińizge sala ketsek, osyǵan deıin Shyǵys Qazaqstanda jappaı tártipsizdik kezinde 70-ke jýyq áskerı qyzmetkerdiń zardap shekkeni habarlanǵan.