07:30, 12 Qyrkúıek 2021 | GMT +5
ShQO-da kolonııa aýmaǵyna smartfondar laqtyrmaq bolǵan 21 jastaǵy jigit ustaldy
ÓSKEMEN. QazAqparat – Shyǵys Qazaqstan oblysynda túrme aýmaǵyna eki uıaly telefon laqtyrmaq bolǵan jigit ustaldy, dep habarlaıdy QazAqparat tilshisi.

ShQO QAJ departamenti baspasóz qyzmetiniń málimetine súıensek, OV 156/2 túzetý mekemesine taıaǵan azamat eki smartfondy qorshaý arqyly ishke kirgizýge tyrysty. Ol kolonııa aýmaǵyn kúzetip júrgen qyzmetkerlerdi baıqamaı qalǵan.
«Skotchpen oralǵan zattardy laqtyrmaq bolǵan kezde ony mekeme qyzmetkerleri ustady. Tártip buzýshyǵa qatysty QR ÁQBtK-niń 481-babyna sáıkes hattama toltyrylyp, sotqa joldandy. Túrmege tyıym salynǵan zattardy kirgizýdiń aldyn alý úshin baqylaý barynsha kúsheıtilgen», - dedi OV 156/2 túzetý mekemesiniń bastyǵy Erkin Kabın.
Esterińizge sala ketsek, osyǵan deıin ShQO-da sottalǵan 80 adam jaza óteý tártibin buzǵany úshin kolonııaǵa jiberilgenin habarlaǵan bolatynbyz.