ShQO-da kólikteri synyp ormanda qalǵan 4 adam qutqaryldy
ÓSKEMEN. QazAqparat – Shyǵys Qazaqstan oblysy Borodýlıha aýdanynda kólikteri synyp ormanda qalǵan 4 adamǵa qutqarýshylar kómekke keldi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 20 tamyz kúni 4 adam, onyń ishinde 1 bala jeńil kólikpen Novoshýlba ormanshylyǵy aýmaǵynda kele jatqan. Kenet kólikteri synyp, olar jolda qaldy. Azamattar qutqarýshylarǵa qońyraý shalyp kómek suraǵan.
«Oqıǵa ornyna №21 órt sóndirý bólimshesiniń qyzmetkerleri jedel kelip jetti. Qutqarýshylar jolaýshylardy Jańa Shúlbi aýylyna deıin jetkizip tastaǵan. Zardap shekken eshkim joq», - dep habarlady vedomstvo ókilderi.
Osy rette, TJD mamandary óńir jurtshylyǵyna qandaı da bir qıyndyqqa tap bolǵan jaǵdaıda «112» nómirine qońyraý shalý qajettigin eske saldy. Jolǵa shyqqanda mindetti túrde óz kóligińizdiń jaramdylyǵyn teksergenińiz abzal.
