ShQO-da kólik muz astyna túsip ketti
ÓSKEMEN. QazAqparat – Shyǵys Qazaqstan oblysy Kókpekti aýdanynda kólik muz astyna túsip ketti, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 14 aqpanda Buqtyrma sý qoımasynyń jaǵasyndaǵy Tabandy qara ýchaskesinde balyqshylar otyrǵan kólik muz astyna túsip ketken. 4 er adam avtomobılden shyǵyp úlgerdi. Eshkim zardap shekken joq.
«Muz qalyńdyǵyn bilmeı balyq aýlaýǵa shyqpaǵan jón. Dál osy Tabandy qara ýchaskesinde kóliktiń muz astyna túsýi birinshi ret tirkelip otyrǵan joq. Sondyqtan azamattarǵa barynsha abaı bolý qajettigin eskertemiz», - delingen habarlamada.
Aıta keteıik, demalys kúnderi qutqarýshylar sý aıdyndarynda baqylaýdy kúsheıtedi. Turǵyndarǵa muzda qaýipsizdik erejelerin saqtaý qajettiligi týraly túsindirý jumystaryn júrgizýde. Qys mezgili bastalǵaly beri 11 myńnan astam balyqshy qamtylǵan.
