ShQO-da kólik aýdarylyp, 3 adam zardap shekti
ShQO Tótenshe jaǵdaılar departamenti baspasóz qyzmetiniń málimetine súıensek, jol-kólik oqıǵasy 18 qyrkúıek kúni «Kúrshim-Úlken Naryn» tasjolynda bolǵan. Zardap shekken azamattardyń biri kólikte qystyrylyp qalyp, ony shyǵarý úshin qutqarýshylardyń kómegi qajet boldy.
«Kia Cerato» markaly avtokólikti tizgindep kele jatqan er adam rýldy basqara almaı qalyp, kólik aýdarylyp túsken. Jol apatynan 3 adam dene jaraqatyn aldy. Oqıǵa ornyna jedel járdem qyzmetkerleri men qutqarýshylar shuǵyl kelip jetti. Zardap shekken azamattardyń biri kólikte qystyrylyp qalyp, syrtqa shyǵa almaǵan», - dep habarlady vedomstvo ókilderi.
№30 órt sóndirý bóliminiń qyzmetkerleri arnaıy quraldardyń kómegimen avtokóliktiń shatyryn ashyp,ony abaılap shyǵaryp, dárigerlerge tapsyrdy. Qazirgi ýaqytta 3 azamat ta aýrýhanaǵa jatqyzylǵan.
