ShQO-da kóligimen sýǵa qulaǵan er adam kóz jumdy

ÓSKEMEN. KAZINFORM – Shyǵys Qazaqstan oblysy Glýbokoe aýdanynda kóligimen sýǵa qulaǵan er adam mert boldy.

ShQO Polıtsııa departamenti baspasóz qyzmetiniń málimetine súıensek, polıtsııaǵa Glýbokoe aýdanyndaǵy demalys bazasynan kóligimen jolǵa shyqqan er adamnyń joǵalyp ketkeni jaıly habar tústi. Tártip saqshylary men qutqarýshylar jedel izdestirý sharalaryna kirisken.

«33 jastaǵy azamattyń denesi men kóligi ózennen tabyldy. Onyń jazataıym oqıǵa saldarynan sýǵa batqany anyqtaldy», - dep habarlady vedomstvo ókilderi.

Sot-medıtsınalyq saraptamasynyń qorytyndysyna sáıkes, er adamnyń kóz jumýyna «mehanıkalyq asfıksııa men sýǵa batý» sebep bolǵan.

Eske salsaq, osyǵan deıin Óskemende 17 jastaǵy boıjetkenniń ózine qol salǵany habarlanǵan.