ShQO-da qoldan jasalǵan elektroqarmaqpen balyq aýlaǵan brakonerler ustaldy
ASTANA. QazAqparat - Shyǵys Qazaqstan oblysynyń Shemonaıha aýdanynda qoldan jasalǵan elektroqarmaqpen balyq aýlap júrgen brakonerler ustaldy, dep habarlaıdy «QazAqparat» HAA tilshisi ShQO tabıǵı resýrstar jáne tabıǵat paıdalanýdy retteý basqarmasynyń baspasóz qyzmetine silteme jasap.
«2017 jyldyń 8 qarashasynda Shyǵys Qazaqstanda oblystyq tabıǵı resýrstar jáne tabıǵat paıdalanýdy retteý basqarmasy men Shemonaıha aýdandyq ІІB tabıǵat qorǵaý polıtsııasynyń qyzmetkerleri birlesip, «Brakoner» jedel-profılaktıkalyq sharasyn júrgizý barysynda Ertis ózeniniń boıyndaǵy Zevakına aýylynda zańsyz balyq aýlap júrgender ustaldy. Olar Glýbokoe aýdanynyń turǵyndary bolyp shyqty. Zańsyz balyq aýlaýshylar ózderi qoldan jasap alǵan elektroqarmaqtarymen balyq aýlaǵan. Olardan salmaǵy 23,5 keli bolatyn ártúrli balyq túrleri tárkilendi», - dep habarlaıdy vedomstvodan.
Atalǵan oqıǵa boıynsha is-materıaldary protsessýaldyq sheshim qabyldaý úshin Shemonaıha aýdanynyń ІІB-ne joldanyp otyr.
