ShQO-da kóktemgi sý tasqynynyń aldyn alýǵa daıyndyq júrip jatyr
ÓSKEMEN. QazAqparat – Shyǵys Qazaqstan oblysynda osy ýaqytqa deıin 700 myń tekshe metr qar shyǵarylǵan, dep habarlaıdy QazAqparat.
Búgin aımaq basshysy Danıal Ahmetovtyń halyq aldynda esep berý kezdesýinde Óskemen qalasynyń turǵyndary qar shyǵarý jumystarynyń baıaý júrgizilip jatqanyn aıtyp shaǵymdandy. Oblys ákimi aldaǵy ýaqytta bul maqsattaǵy jumystardyń kúsheıetinin jetkizdi.
«Óńir boıynsha - 700 myń, al Óskemende - 125 myń tekshe metr qar shyǵarylǵan. Bul ótken jylǵydan 2 esege kóp. Árıne, jaýapty mekemeler óz jumysyn tolyq atqarýy kerek. Osy oraıda tıisti tapsyrmalar berildi», - dedi ol.
Onyń aıtýynsha, 108 eldi mekende sý tasqyny júrý qaýpi bar. Buǵan sebep – taý ózenderindegi qar mólsheri ortasha jyldyq normadan 20-50% joǵary.
«Tasqynnyń aldyn alý maqsatynda qosymsha muz jarý jumystaryna 150 mln teńge bólingen. Qajet bolǵan jaǵdaıda bul somany kóbeıtemiz. Sondaı-aq irili-usaqty 222 sý qoımasy baqylaýǵa alynǵan. Ydys-qap pen ınertti materıaldar ázirlenýde», - dedi Danıal Kenjetaıuly.
