ShQO-da kóktaıǵaqqa baılanysty tasjoldardyń biri jabyldy

ÓSKEMEN. QazAqparat – Shyǵys Qazaqstan oblysynda kóktaıǵaqqa baılanysty tasjoldardyń biri jabyldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, búgin saǵat 18.00-den bastap oblystyq mańyzy bar joldardyń biri jabyldy.

- «Óskemen-Taýly Úlbi-Soltústik» tasjolynyń 23-45 shaqyrymynda avtokólikterdiń barlyq túri úshin jol jabyq. Buǵan kóktaıǵaq, tuman jáne joldyń durys kórinbeıtindigi sebep bolyp otyr, - dep habarlady vedomstvo ókilderi.

Osy rette, qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldi qosymshasy arqyly tekserip otyrýǵa keńes berdi.