ShQO-da qoqys tastaǵandar dron arqyly anyqtalyp jatyr
ÓSKEMEN. KAZINFORM — Shyǵys Qazaqstan oblysynda qoqys tastaǵandar dron arqyly anyqtalyp, jaýapqa tartylyp jatyr.
«Taza Qazaqstan» ekologııalyq bastamasy aıasynda polıtsııa qyzmetkerleri jergilikti ákimdiktermen birlesip, shalǵaıdaǵy bos aýmaqtardy jáne ónerkásiptik aımaqtardyń shetki bólikterin drondar arqyly baqylaýda.
Áýeden patrýldeý qurylys jáne turmystyq qaldyqtar jasyryn tógilgen oryndardy jedel anyqtaýǵa múmkindik beredi. Sonymen qatar quqyq buzýshylardyń júk kólikteri men arnaıy tehnıkalarynyń memlekettik tirkeý nómirleri qoqys tógilgen jerde tirkeledi.
— Drondardy paıdalaný jerústi patrýlderi jete almaıtyn qıyn ýchaskelerdi tekserýge múmkindik berip otyr. Jyl basynan beri óńirde ruqsat etilmegen 203 qoqys orny anyqtaldy. Onyń 185-i qazirgi ýaqytta tolyqtaı joıyldy. Abattandyrý salasynda barlyǵy 8 117 ákimshilik quqyq buzýshylyq tirkeldi. Budan bólek, zańbuzýshylyqtardy joıý maqsatynda jergilikti atqarýshy organdar men kásiporyndarǵa 11 resmı uıǵarym joldandy, — dep habarlady ShQO polıtsııa departamentinen.
Osy rette, quqyq qorǵaý organdary turǵyndar men kásipkerlerge qoqysty belgilenbegen jerlerge tastaǵany úshin ákimshilik jaýapkershilik qarastyrylǵanyn eske saldy.
Eske salsaq, osyǵan deıin Qyzylordada drondardyń kómegimen myńǵy jýyq jol erejesin buzý deregi anyqtalǵany habarlanǵan.
