ShQO-da qoǵamdyq keńesterdiń ózara baılanysyn kúsheıtetin arnaıy joba iske asyp jatyr
«Biz «Qoǵamdyq keńester qyzmeti aıasynda turǵyndardy aýmaqtardy basqarýǵa tartý arqyly jergilikti ózin-ózi basqarýdy damytý» dep atalatyn úshjyldyq jobany júzege asyrýdamyz. Ol ShQO ishki saıasat basqarmasy tarapynan qarjylandyrylýda. Jobanyń mańyzy óte zor. Azamattardy sheshim qabyldaý úderisine tartýǵa múmkindik beredi, oblystyq, qalalyq, aýdandyq deńgeıdegi bılik qurylymdarymen suhbat qurýǵa, pikir almasýǵa jaǵdaı jasap otyr. Joba aıasynda Shyǵys Qazaqstan oblysynyń qoǵamdyq keńesiniń jumysyn úılestirýmen qatar, barlyq aýdandardaǵy qoǵamdyq keńestermen tyǵyz baılanys uıymdastyrylýda», - deıdi «Jergilikti ózin-ózi basqarýdy damytý ortalyǵy» qoǵamdyq qorynyń dırektory Rýfıt Ahmedzıanov.
Onyń aıtýynsha, qoǵamdyq keńes aıasynda qurylǵan túrli baǵyttarda jumys isteıtin komıtetterdiń jumysy jolǵa qoıylǵan, halyqtan kelip túsken máselelerge oraı reıdter júrgiziledi.
«Máselen, joba barysynda bıyl oblys boıynsha 52 reıd ótkizildi. Onda mekemelerdegi pandýstardyń bar-joǵyn tekserý, bızneske jasalǵan jaǵdaıdy baqylaý, bas bostandyǵynan aıyrý oryndarynda jazasyn ótep shyqqan adamdardyń áleýmettený máselelerin qarastyrý, ekologııalyq jaǵdaıǵa barlaý jasaý syndy baǵyttar qamtyldy», - deıdi Rýfıt Ahmedzıanov.
«ShQO taldaý jáne boljaý ınstıtýty» JShS atqarýshy dırektory Aıaýjan Áshimovanyń aıtýynsha, qoǵamdyq keńester týraly zań Qazaqstanda 2015 jyly qabyldansa da, Shyǵys Qazaqstandaǵy qoǵamdyq keńes oǵan deıin birneshe jyl buryn qurylyp qoıǵan.
«Ol kezde ShQO qoǵamdyq keńesiniń quramyna oblystyq deńgeıdegi uıymdardyń – partııa, kásipodaqtar, úkimettik emes uıymdar, atqarýshy organdar, etnomádenı ortalyqtar ókilderi kirgen. Óńirdegi eń mańyzdy máselelerdi talqyǵa salyp, jaǵdaıdy jaqsy jaqqa ózgertýge qajetti sheshim qabyldaýǵa áser etetin. Keıinnen tıisti zań qabyldanyp, qoǵamdyq keńesterdiń jumysy osy zańǵa sáıkes rettele bastady. Biraq árkez áýel bastaǵy tájirıbege sáıkes bizdiń Taldaý jáne boljaý ınstıtýtymyz qoǵamdyq keńesterdiń jumysyn úılestirýge atsalysýda. Qazir qoǵamdyq keńesterge ádistemelik keńes berýmen shuǵyldanamyz. Sonymen qatar ınstıtýt negizinde oblystyq qoǵamdyq keńestiń qoǵamdyq qabyldaýy jumys isteıdi. Osy jyldyń ózinde qoǵamdyq qabyldaýǵa telefon, áleýmettik jeliler arqyly nemese tikeleı kelip 214 azamat aryz-ótinishin aıtyp, tıisti keńes alyp, máselelerin sheshýge múmkindikke ıe boldy. Sondaı-aq qoǵamdyq qabyldaý aıasynda túrli baǵyttar boıynsha halyq arasynda túsindirý jumystary júrgiziletinin atap ótken jón», - deıdi ol.
Aıaýjan Áshimovanyń sózinshe, kelesi jyly osy baǵyttaǵy jumystar jalǵasady.
ıAǵnı, túrli taqyryptardaǵy talqylaýlar, qoǵamdyq qabyldaý, reıdter, kóshpeli otyrystar, túrli deńgeıdegi qoǵamdyq keńesterge arnalǵan oqytý semınarlary, osy baǵyttaǵy máselelerdi talqylap, tájirıbe almasýǵa arnalǵan konferentsııalar ótedi.
Jobany ınstıtýt pen qoǵamdyq qor birlese oryndap jatyr.
«Eki jylda bir ret ótetin respýblıkalyq qoǵamdyq keńester májilisinde ShQO qoǵamdyq keńesiniń jumysy únemi joǵary baǵalanady. Onyń bir sebebi – 12 baǵytta qurylǵan qoǵamdyq keńes komıtetteriniń turaqty jumysynda. ıAǵnı, ShQO qoǵamdyq keńesi tek múshelerinen ǵana turmaıdy, olarǵa kómekke túrli qoǵam belsendileri qoǵamdyq keńes komıtetteriniń jumysy aıasynda kelip otyr deýge bolady», - deıdi «ShQO taldaý jáne boljaý ınstıtýty» JShS atqarýshy dırektory.
