ShQO-da Qyzyl kitapqa engen sırek jarqanat kózge tústi
ÓSKEMEN. KAZINFORM — Qazaqstannyń Qyzyl kitabyna engen, álemdegi eń az zerttelgen jarqanat túrleriniń biri — Ikonnıkov tún jarqanaty Shyǵys Qazaqstan oblysyndaǵy Qatonqaraǵaı ulttyq parkiniń aýmaǵynda kózge tústi.
Bul týraly Qatonqaraǵaı ulttyq parkiniń ǵylym, ekologııalyq monıtorıng jáne aqparat bólimi habarlady. Sırek janýardyń sýretin bólim qyzmetkeri Irına Baeva túsirgen.
— Ikonnıkov tún jarqanaty — Ońtústik Sibirge tán sırek kezdesetin túr. Ol orys dvorıany ári entomolog Nıkolaı Ikonnıkovtyń qurmetine atalǵan. Ǵylymı turǵydan áli de tolyq zerttelmegen bul jarqanat Qazaqstan aýmaǵynda buryn tek Altaı taýly aımaǵynyń batys bóliginde, naqtyraq aıtqanda Qatonqaraǵaı aýdanyndaǵy Chernovaıa aýyly mańynda jáne Tıgırets jotasynda ǵana anyqtalǵan, — delingen aqparatta.
Jarqanattyń bul túri ormanda jáne taýly-taıgalyq jerlerde mekendeıdi. Ushatyn jándiktermen qorektenedi.
Osylaısha, Qatonqaraǵaı ulttyq parki Ikonnıkov tún jarqanatyn zertteý men saqtaýda asa mańyzdy aýmaq bolyp otyr.
Eske salsaq, osyǵan deıin Katonqaraǵaı tabıǵı parkinde sırek kezdesetin qus fototuzaqqa túsip qalǵany habarlanǵan.