ShQO-da Qyzyl kitapqa engen balyqtardy zańsyz aýlaǵan top ustaldy
ASTANA. KAZINFORM – Shyǵys Qazaqstan oblysynda Qyzyl kitapqa engizilgen balyq túrlerin zańsyz aýlaýmen aınalysqan brakonerler tobynyń joly kesildi.
Polisia.kz málimetinshe, operatsııany ShQO polıtsııa departamentiniń uıymdasqan qylmysqa qarsy kúres basqarmasy men UQK-niń oblystyq departamenti birlesip júrgizgen.
Jedel is-sharalar barysynda Marqakól aýdanynda 23 pen 50 jas aralyǵyndaǵy alty adamnan quralǵan top ustaldy. Tergeý nusqasyna sáıkes, olar qoryq aýmaǵynda Qyzyl kitapqa engen balyqtardy zańsyz aýlaýdy kásipke aınaldyrǵan.
«Marqakól jáne Ýrýnhaıka aýyldarynda júrgizilgen tintý kezinde baǵaly balyq túrleriniń 700 keliden astamy, onyń ishinde ýských pen harıýs balyǵy, sondaı-aq 200 lıtrden astam ýských ýyldyryǵy tárkilendi», – dep habarlady polıtsııa.
Sonymen qatar kúdiktilerden tyıym salynǵan aý quraldary, balyq aýlaý jabdyqtary, qysqy balyq aýlaýǵa arnalǵan qurylǵylar, radıostantsııalar men oq-dáriler alynǵan.
Atalǵan derekter boıynsha sotqa deıingi tergep-tekserý bastaldy.
Sot sanktsııasymen kúdiktilerge qatysty úıqamaq túrindegi bultartpaý sharasy qoldanyldy.
Qazirgi ýaqytta quqyq qorǵaý organdary zańsyz árekettiń barlyq mán-jaıyn anyqtap, yqtımal sybaılastar men zańsyz jolmen alynǵan ónimdi ótkizý arnalaryna qatysty tergeý jumystaryn júrgizip jatyr.
Aıta keteıik, batysta brakonerlerden 8 tonnadan asa balyq pen 10 keli ýyldyryq tárkilendi.
