ShQO-da qystyń borandy kúnderinde jolshylar 30 myńnan astam kólikti kolonnamen alyp júrdi

ÓSKEMEN. KAZINFORM — Shyǵys Qazaqstan oblysynda bıylǵy qysta respýblıkalyq tasjoldarda myńdaǵan kólik qar qursaýynan shyǵarylyp, 96 ret qozǵalys shekteldi. 

Óńirdegi respýblıkalyq mańyzy bar avtomobıl joldaryn qysqy kútip-ustaý jumystarynyń alǵashqy qorytyndylary shyǵaryldy. «QazAvtoJol» UK» AQ ShQO fılıaly baspasóz qyzmetiniń málimetinshe, qys mezgilinde respýblıkalyq joldarda qozǵalys 49 ret tolyq jabylyp, 47 ret kóliktiń jekelegen túrleri úshin shekteý engizildi.

— Boran men qarly kúnderde qyzmetkerlerimiz eń qaýipti ýchaskeler arqyly 30 myńǵa jýyq kólikti kolonnamen alyp júrdi. Qar qursaýynda qalǵan júzdegen júrgizýshi qutqaryldy. Qaýipsiz qozǵalysty qamtamasyz etý úshin joldarda táýlik boıy 120-dan astam qyzmetker jáne 100-den asa arnaıy tehnıka jumys istedi, — dedi «Qajservıs» JShS oblystyq fılıalynyń bas ınjeneri Shyńǵys Zaıtov. 

Qysqy kútip-ustaý jumystarynyń sapasyna baqylaýdy «Jol aktıvteri sapasynyń ulttyq ortalyǵy» RMK ShQO fılıalynyń mamandary júrgizedi. Maýsym barysynda 13 ret kóshpeli tekseris jasaldy.

— Osy maýsymda óńirdegi barlyq respýblıkalyq tasjoldardyń qysqy kútimi tekserildi. Sonyń barysynda anyqtalǵan kemshilikter jedel túrde joıylyp otyrdy, — deıdi fılıal bóliminiń basshysy Saıahat Musapyrov.

Eske salsaq, osyǵan deıin ShQO-da qar kóshkini qaýpi joǵary ýchaskelerge tikushaqpen barlaý jasalǵany habarlanǵan.