ShQO-da qys mezgilinde aýa raıy qandaı bolady
ÓSKEMEN. KAZINFORM — Eldiń basym bóliginde bıylǵy qys ádettegiden jyly bolyp, qar molynan jaýady de boljanyp jatqanymen Shyǵys Qazaqstan oblysynda qalypty qysqy aýa raıy aıtarlyqtaı ózgermeıdi dep kútilýde.
«Qazgıdromet» RMK-nyń 2026-2027 jyldardaǵy qys mezgiline arnalǵan boljamyna súıensek, shyǵys óńiri úshin aýa raıy respýblıkadan ózgeshe bolmaq.
Sınoptıkter Qazaqstannyń basqa aımaqtarynda aýa temperatýrasy 1-3 gradýsqa joǵarylap, mezgil sońynda qar molynan jaýady dep boljap otyr. Al ShQO-da úsh aı boıy qar mólsheri klımattyq norma shamasynda saqtalady.
Qardyń shamadan tys jaýmaýy taýly aımaqtardaǵy qar kóshkini qaýpin jáne respýblıkalyq mańyzy bar joldarda qar qursaýynyń paıda bolý yqtımaldyǵyn tómendetedi.
Al aýa temperatýrasynyń aılyq kórsetkishteri kelesideı bolady:
— Jeltoqsan aıynda aýa temperatýrasy kúrt qubylmaıdy. ShQO-da ortasha aılyq temperatýra kópjyldyq norma sheginde saqtalady. Al respýblıka boıynsha qystyń alǵashqy aıy ádettegiden 1-2 gradýs jyly bolady dep kútilýde;
— Qańtarda óńirdegi aýa temperatýrasy aıtarlyqtaı ózgeredi. Shyǵys Qazaqstanda termometr baǵany ortasha kórsetkishten 1-2 gradýsqa joǵary bolýy múmkin. Bul qańtardyń dástúrli aıazyn birshama báseńdetýi yqtımal;
— Aqpanda aımaqta ádettegi qysqy sýyq qaıta ornaıdy. Qazaqstannyń basqa aımaqtarynda kúnniń erterek jylynýy, aýa temperatýrasynyń normadan 1-3 gradýsqa joǵary bolýy jáne qardyń mol túsýi boljanyp otyr. Al elimizdiń shyǵysynda, Abaı oblysynyń soltústik-shyǵys bóliginde jáne soltústik óńirlerde qysqy aýa raıy klımattyq norma sheginde saqtalady.
Soltústik Qazaqstan jáne Shyǵys Qazaqstan oblystarynda, Pavlodar oblysynyń basym bóliginde jáne Abaı oblysynyń soltústik-shyǵys jartysynda ortasha aılyq aýa temperatýrasy klımattyq norma shamasynda bolady dep kútilip otyr. Bul aıda respýblıka aýmaǵynyń basym bóliginde jaýyn-shashyn mólsheri klımattyq normadan joǵary bolady. Al Shyǵys Qazaqstanda kópjyldyq ortasha kórsetkishterge sáıkes saqtalady.
Eske salsaq, osyǵan deıin Óskemende úsh kún qatarynan aýadaǵy kúkirt dıoksıdiniń mólsheri shekti deńgeıden asyp otyrǵandyǵy habarlanǵan.