ShQO-da qymbat metaldardy zańsyz óndirýshiler ustaldy
ASTANA. KAZINFORM - Zańsyz áreketterden qorshaǵan ortaǵa keltirilgen zııan 300 mln teńgeden asty, dep habarlaıdy QR qarjylyq monıtorıng agenttiginiń baspasóz qyzmeti.
Baspasóz qyzmetiniń habarlaýynsha, QMA Shyǵys Qazaqstan oblysy boıynsha departamenti Ulan aýdany Shybyndy ózeni ańǵarynda qymbat metaldardy zańsyz óndirý jáne jer qoınaýyn óz betinshe paıdalaný faktisi boıynsha tergep-tekserý jumystaryn jalǵastyryp jatyr.
Tergeý barysynda «Azamattarǵa arnalǵan úkimet» KEAQ dırektory orynbasarlarynyń biri basqa adamdarmen birge áreket ete otyryp, ken ornyn zańsyz ıgerýdi uıymdastyrǵany anyqtaldy. Osy maqsatta olar óz baqylaýyndaǵy «EastGoldStone» JShS-in tirkep, paıdalanǵan.
Buǵan deıin habarlanǵandaı, altyn óndirý jumystary eki jyl boıy tıisti lıtsenzııasyz, aýyr arnaıy tehnıkany qoldanyp, ózenniń tabıǵı arnasyna aralasý arqyly júrgizilgen.
Atqarylǵan zańsyz áreketterdiń nátıjesinde qorshaǵan ortaǵa keltirilgen zalal 300 mln teńgeden asty.
Tintý barysynda jalpy quny 382 mln teńge bolatyn 6,7 kg altyn, 10 mln teńge jáne 56 myń AQSh dollary mólsherinde qolma-qol aqsha tárkilendi. Bul qarajatqa sot sanktsııasymen buǵattaý qoıyldy.
- Kúdiktiler 2 aı merzimge qamaýǵa alyndy. Tergeý amaldary jalǵasýda. QR QPK-niń 201-babyna sáıkes ózge aqparat jarııa etýge jatpaıdy, - delingen habarlamada.
Osyǵan deıin Aqmola oblysynda «Nurly jer» baǵdarlamasynyń qarjysy jymqyrylǵany týraly jazdyq.