ShQO-da qymbat metaldardy zańsyz óndirdi degen kúdikpen 19 sheteldik azamat ustaldy
ÓSKEMEN. KAZINFORM — Shyǵys Qazaqstan oblysynyń polıtseıleri paıdaly qazbalardy zańsyz óndirý faktisin anyqtady
Polıtsııa zań tártibine ǵana emes, aımaq ekologııasyna da qater tóndirgen qylmystyq árekettiń jolyn kesti.
«Quqyqtyq tártip» jedel-profılaktıkalyq is-sharasy barysynda Shyǵys Qazaqstan oblysynyń polıtseıleri paıdaly qazbalardy zańsyz óndirý faktisin anyqtady.
Oblystyń bir aýdanynda 19 sheteldik azamat pen Óskemen qalasynyń 2 turǵyny ustalǵan.
Qymbat metalldardy óndirýge arnalǵan ekskavatorlar, býldozer, usatqysh qondyrǵylar jáne basqa da jabdyqtar, sondaı-aq quramynda altyn men basqa da baǵaly komponentterdiń belgileri bar metall buıymdary tárkilendi.
Atalǵan fakti boıynsha sotqa deıingi tergeý bastaldy. Tergeý barysynda quqyqqa qarsy áreketke qatysy bar bolýy múmkin 20-dan astam adam tekserilip jatyr. Dálelder jınalyp, qajetti saraptamalar taǵaıyndaldy, istiń barlyq mán-jaıyn anyqtaý sharalary qabyldanyp jatyr.
Aıta ketelik Qyzylordada paıdaly qazbalardy zańsyz óndirgender ustalǵan edi.