ShQO-da kesheli beri jolda qalǵan 194 adam evakýatsııalandy
ÓSKEMEN. QazAqparat – Shyǵys Qazaqstan oblysynda 1-2 naýryz kúnderi jolda qalǵan 194 adam, onyń ishinde 18 bala evakýatsııalandy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, qazirgi ýaqytta óńir boıynsha 12 tasjolda kólik qozǵalysyna tyıym salynǵan. Onyń 4-i respýblıkalyq, 8-i oblystyq mańyzy bar jol.
1-2 naýryz kúnderi qutqarýshylar 194 adamdy, onyń ishinde 18 balany evakýatsııalady. 20 tehnıka men jeke quramnan 50 adam jolda qalǵandarǵa kómek kórsetýde.
«Máselen, «Borodýlıha-Jezkent» tasjolynda «Toıota Harrıer» kóligi qar qursaýynda qalǵan. Oqıǵa ornyna shuǵyl jetken qutqarýshylar arnaıy tehnıkanyń kómegimen kólikti qardan shyǵardy», - delingen habarlamada.
Osy rette, TJD turǵyndarǵa alys saparǵa shyqpaýǵa, joldardyń jaı-kúıin «Dármen» mobıldi qosymshasy arqyly tekserip otyrýǵa keńes beredi.
