ShQO-da kesheden beri iz-túzsiz ketken 3 jasar bala aman-esen tabyldy
ÓSKEMEN. QazAqparat – Shyǵys Qazaqstan oblysy Ulan aýdanynda joǵalǵan 3 jasar bala aman-esen tabyldy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, Ulan aýdany Tavrııa aýylynda joǵalyp ketken Ádilhan esimdi bala aman tabylǵan.
- Jedel izdestirý sharalarynyń nátıjesinde úsh jasar bala turǵylyqty jerinen 3 shaqyrym jerdegi alqaptan tabyldy. Qazirgi ýaqytta bala úıinde, ata-anasynyń qasynda. Olar izdestirýge kómektesken barlyq azamattarǵa alǵysyn aıtyp jatyr. Oqıǵanyń mán-jaıy anyqtalyp jatyr, - delingen aqparatta.
Esterińizge sala ketsek, osyǵan deıin ShQO-da 3 jasar balanyń joǵalǵanyn habarlaǵan edik.
Ol ádettegideı aýlaǵa oınaýǵa shyqqan, biraq biraz ýaqyttan keıin joǵalyp ketken.
Aýqymdy izdestirý operatsııasynda aýyl aýmaǵy 16 sektorǵa bólingen. Barlyǵy 621 adam jumyldyryldy.
Sondaı-aq kvadrokopterler men tikushaq tartylǵan.
