ShQO-da kene shaqqandar eki aıdan beri ımmýnoglobýlın saldyrta almaı otyr

  ÓSKEMEN. KAZINFORM - Shyǵys Qazaqstan oblysynda keneden zardap shekkenderge birneshe aıdan beri ımmýnoglobýlın egilmeı keledi.

Oblysta kene shaqqan naýqastarǵa salatyn ımmýnoglobýlın joq. ShQO Densaýlyq saqtaý basqarmasynyń málimetine súıensek, bul másele jaz ortasynan beri ózekti.

- Naýryz aıynda óńirge 23 850 ml kene entsefalıtine qarsy ımmýnoglobýlın jetkizilgen. Alaıda kúnniń erte jylyp ketýi men keneden zardap shekkenderdiń kóbeıýine baılanysty bul kólem jetkiliksiz bolyp qaldy. Osyndaı tapshylyq tek bizde ǵana emes, búkil el boıynsha baıqalyp otyr, - deıdi basqarma basshysynyń orynbasary Madına Myrzabekova.

Densaýlyq saqtaý basqarmasy preparat jetkizýshige resmı hat joldaǵan.

- Ol jaqtan qazir kelisimshart jasalyp, qosymsha ekpeler satyp alynyp jatyr degen jaýap keldi. Sondaı-aq bizde ýaqytsha kórshi óńirlerden qajetti mólsherde preparat alý múmkindigi de qarastyrylyp jatyr. Osy aıdyń sońyna deıin másele sheshimin tabýy tıis, - deıdi M.Myrzabekova.

Eske salsaq, bıyl Qyzylorda oblysynda kenege qarsy kúreske 243,6 mln teńge bólingeni habarlanǵan.