ShQO-da kene entsefalıtine qarsy 1300 gektardan astam aýmaq óńdeledi
ÓSKEMEN. KAZINFORM – Shyǵys Qazaqstan oblysynda kene entsefalıtine qarsy endemııalyq aýmaqtardy óńdeý jumystary júrgizilip jatyr.
Óńir boıynsha 7 sáýir men 12 mamyr aralyǵynda júrgiziletin dezınsektsııalyq jumystarǵa zamanaýı preparattar qoldanylady. Іs-sharalardy oryndaý úshin tórt arnaıy brıgada qurylǵan.
Bul týraly Ulttyq saraptama ortalyǵy ShQO boıynsha fılıaly dezınfektsııa bóliminiń basshysy Gúlmıra Ádilbaeva habarlady.
– Júrgizilip jatqan jumystardyń negizgi maqsaty – qaýipti juqpaly aýrýlardy taratatyn keneler men kemirgishterdiń sanyn azaıtý. Óńdeý jumystary aıaqtalǵannan keıin aýmaqtarǵa arnaıy eskertý belgileri ornatylady. Óńdelgen aýmaqtarda ýaqytsha mal men qus jaımaý qajet. Sebebi qoldanylatyn preparattar olarǵa zııan keltirýi múmkin, - dedi ol.
Epıdemııaǵa qarsy is-sharalar Óskemen, Rıdder qalalaryn jáne Ulan, Glýbokoe, Samar, Kúrshim, Marqakól, Zaısan, Tarbaǵataı, Katonqaraǵaı, Úlken Naryn, Shemonaıha, Altaı aýdandaryn qamtıdy. Qazirgi ýaqytta óńdeý jumystary Óskemen qalasy men Ulan aýdanynda tolyq aıaqtalǵan.
Eske salsaq, osyǵan deıin Shyǵys Qazaqstanda 100-ge jýyq adamdy kene shaqqany habarlanǵan.
