ShQO-da kelini enesiniń atynan bildirtpeı 2 jarym mln teńge nesıe rásimdep alǵan

ÓSKEMEN. KAZINFORM – Shyǵys Qazaqstan oblysy Zaısan aýdanynda kelini enesiniń atynan uıaly telefony arqyly 2 jarym mln teńge nesıe rásimdep alǵan. 

Zaısan aýdandyq polıtsııa bólimine 67 jastaǵy jergilikti turǵyn alaıaqtyq týraly aryzben júgingen. Onyń aıtýynsha, kelini onyń atynan jasyryn túrde 2,5 mln teńgeden astam somaǵa nesıe rásimdegen.

«Belgili bolǵandaı, ótken jyly kelini onyń uıaly telefonyna banktik qosymsha ornatqan. Sol qosymsha arqyly zeınetkerdiń shotyna kirýge múmkindigi bolǵan. Jeltoqsan men qańtar aılary aralyǵynda jumyssyz qalǵan boıjetken qosymshanyń kómegimen enesiniń atyna úsh nesıe rásimdep, aqshany óz qajettilikterine jumsaǵan», - dep habarlady ShQO Polıtsııa departamentiniń baspasóz qyzmeti.

Jábirlenýshi sáýir aıynda ádettegiden áldeqaıda az zeınetaqy alǵannan keıin mán-jaıdyń sebebin izdeı bastaǵan. Sol kezde bank onyń zeınetaqysynan ózi bilmeıtin nesıeler úshin aqshalaı qarajatty ustap qalǵany anyqtaldy.

«Alaıaqtyq faktisi boıynsha qylmystyq is qozǵaldy. Kúdikti múlkin tárkileýmen, tórt jylǵa deıingi merzimge bas bostandyǵynan aıyrylýy múmkin», - delingen aqparatta.

Eske salsaq, osyǵan deıin Rıdder turǵynynyń úıinen 7 keli esirtki tabylǵany habarlanǵan.