ShQO-da kelesi jyldan janýarlarǵa qutyrýǵa qarsy jappaı vaktsına salynbaq

ÓSKEMEN. KAZINFORM — Shyǵys Qazaqstan oblysynda qutyrý aýrýynyń aldyn alý tásili ózgeredi. 2027 jyldan bastap óńirdiń ár aýdanynda veterınarlar aýrý oshaqtary anyqtalǵannan keıin ǵana áreket etpeı, barlyq úı jáne aýyl sharýashylyǵy janýarlaryn jappaı vaktsınatsııalaýǵa kóshedi.

ıt
Foto: Darıa Averchenko/Kazinform

Mundaı sheshim jabaıy ańdar arasynda júrgizilgen monıtorıng nátıjelerine baılanysty qabyldanǵan. Óńirlik kommýnıkatsııalar qyzmetinde ótken brıfıngte ShQO veterınarııa basqarmasynyń basshysy Ramıl Saǵyndyqov 2027 jyldan bastap aımaqtaǵy barlyq maldy profılaktıkalyq ekpemen qamtý josparlanyp otyrǵanyn málimdedi.

Buǵan deıin oblysta vaktsınatsııa jumystary negizinen aýrý oshaǵy anyqtalǵannan keıin júrgizilip kelgen, ıaǵnı qaýipti ınfektsııa tirkelgen jaǵdaıda ǵana mal men úı janýarlaryna jappaı ekpe salynatyn. Alaıda shekaralas aýmaqtardaǵy túz taǵylary arasynda ınfektsııanyń taralý qaýpi aldyn alý sharalaryn kúsheıtýdi talap etip otyr. 

— Oblystyń shekaralas aýdandarynda jabaıy janýarlarǵa júrgizilgen zertteý nátıjesinde qutyrý aýrýynyń 10 jaǵdaıy zerthanalyq jolmen rastaldy. Bul profılaktıkalyq jumystarǵa erekshe kóńil bólý qajettigin kórsetedi. Túz taǵysy úı nemese aýyl sharýashylyǵy janýarlaryna juqtyryp úlgergenshe kútpeı, aldyn alý sharalaryn qolǵa alýymyz kerek, — dedi Ramıl Saǵyndyqov.

Mamandardyń aıtýynsha, qutyrý — janýardan adamǵa tisteý nemese silekeıdiń jaraqattanǵan terige túsýi arqyly juǵatyn, asa qaýipti ári ólimge ákeletin zoonozdyq ınfektsııa.

Aýlalardaǵy barlyq janýardy josparly túrde jappaı vaktsınatsııalaý jabaıy tabıǵat pen eldi mekender arasyndaǵy ınfektsııanyń taralýyna tosqaýyl qoıýǵa múmkindik beredi. Bul shara sharýa qojalyqtaryn qorǵaýmen qatar, oblys turǵyndarynyń densaýlyǵy men qaýipsizdigin qamtamasyz etýge baǵyttalǵan.

Eske salsaq, buǵan deıin Reseıde vaktsınadan keıin 100-den astam ıt ólgeni habarlanǵan.