ShQO-da qazan aıynda halyqaralyq búrkitshiler festıvali ótedi
ÓSKEMEN. KAZINFORM – Shyǵys Qazaqstan oblysynda qazan aıynda «Shyǵys salburyny» halyqaralyq búrkitshiler festıvali ótedi.
ShQO ákimdiginiń málimetine súıensek, 10-14 qazan kúnderi Ulan aýdany Bozanbaı aýylynyń mańyndaǵy «Búrkit tóbe» alańynda dástúrli «Shyǵys salburyny» halyqaralyq búrkitshiler festıvali ótedi.
Festıvalge respýblıkanyń ár túkpirinen jáne shet elderden, atap aıtqanda Mońǵolııadan, Vengrııadan, Reseıden, Ispanııadan, Qytaıdan 130-dan astam adam qatysady. Negizgi is-sharalar 11-12 qazanǵa josparlanǵan. Keletin qonaqtardyń jalpy sany – 4000-5000 aralyǵynda.
«Búrkit tóbe» alańynda 20-dan astam kıiz úı tigiledi. Onda týrıster úshin búrkitter men suńqarlar saıysy ǵana emes, túıege otyrý, altybaqan, sadaq atý jáne basqa da kóptegen oıyn-saýyq uıymdastyrylady.
«Festıval qonaqtaryna óńirdiń tanymal gastrofırmalarynan tamaqtaný uıymdastyrylmaq. Jarys baǵdarlamasyna túrli sanattaǵy búrkitter men suńqarlar saıysy, «tazy» tuqymyndaǵy júırik ıtterdiń jarysy, «jamby atý» jáne «teńge ilý» dodalary kiredi», - delingen aqparatta.
