ShQO-da qazaqtyń aqbas sıyryn ósirip otyrǵan kásipker týǵan aýylyn damytýǵa úles qosýda
Kindik qany tamǵan aýylǵa jyl saıyn 15 mln teńge aqsha quıatyn ol aldaǵy jyldary jas mamandarǵa úı jáne meshit salmaq.
Jastar aýylǵa qaıtyp jatyr
XX ǵasyrdyń basynda Shyǵys Qazaqstan oblysy Jarma aýdanynda ǵalymdar sıyrdyń elıtalyq tuqymyn - qazaqtyń aqbas sıyryn ósirdi. Biraq Keńes odaǵy ydyraǵan kezde keńshar da, aýyldyń ózi de quldyrap ketti. Aýyl turǵyndarynyń kóbi jaqsy ómir izdep qalaǵa boı túzedi. Sol jyldary mektepte 300 balanyń 180-i ǵana qalǵan.
«Quldyrap bara jatqan aýylymyz erteń múlde joq bolyp ketedi degendi oılaǵan saıyn ózegim órtendi. Birde gazet betin paraqtap otyrǵanda aýyl sharýashylyǵy týraly maqalaǵa kózim tústi. Bul materıaldyń maǵan kúshti áser qaldyrǵany sondaı, osy ýaqytqa deıin muǵalim bolyp kelip, aıaq astynan týǵan jerimde mal sharýashylyǵyn jandandyrýǵa sheshim qabyldadym. Bul jer qazaqtyń aqbas sıyrynyń otany bolǵandyqtan, sol tuqymdy ósirýdi qaıta jańǵyrtý kerek dep oıladym. Sebebi aqbas sıyr – muqym eldiń maqtanyshy. Árıne, basynda ońaı bolǵan joq. Qazaqstan ınvestıtsııalyq qoryna hat jazdym. Jaýapty uzaq kúttim, kókiregimdi sary ýaıym torlady. Biraq óz dálelderim men esepteýlerime senimdi boldym. Mine, sondyqtan olar meni qoldady» - deıdi Qýanysh Súleımenov.
Kásipti ilgeriletý ońaıǵa túsken joq. 150 bas satyp alǵan tustaǵy qys mezgiliniń yzǵarly bolǵandyǵy onyń áli kúnge deıin esinde. Sonda da shydamdylyq tanytyp, sharýashylyqty birtindep damyta bastady. Keıipkerimizdiń aıtýynsha, negizgi mindet – elıtalyq sıyrlardy ósirý emes, aýyldyń ekonomıkalyq jáne áleýmettik jaǵdaıyn jaqsartý bolǵan. Eń bastysy, jergilikti halyqqa birliktiń arqasynda barlyǵyn jaqsy baǵytqa ózgerte alýǵa bolatyndyǵyna senim uıalatý qajet edi. Qazir oqýdy bitirgen jastar týǵan aýylyna qaıtyp kelip jatyr. Sebebi sharýa qojalyǵynda jataqhana, kúnine 3 mezgil tamaqtandyratyn ashana bar. Jyl saıyn aýyl ekonomıkasyn damytýǵa qojalyq 15 mln teńge bóledi.
Argentınalyqtar qyzyǵýshylyq tanytýda
Búginde «Shalabaı» sharýa qojalyǵynda qazaqtyń elıtalyq aqbas tuqymdy sıyrynyń 3,5 myń basy bar. Bul tuqymdy satyp alý úshin basqa aýdandar men oblystardan sharýagerler jıi kelip jatady.
«Tabynnan jaqsy asyl tuqymdy buqalardy shyǵaramyz. Olardyń tólderin Qazaqstannyń túkpir-túkpirindegi aımaqtarǵa taratýdy josparlap otyrmyz. Osylaısha tuqym sapasyn jaqsartqymyz keledi. Qazirdiń ózinde sheteldik malshylardyń qyzyǵýshylyǵy baıqalyp otyr. Sondyqtan eksportqa shyǵatyn kún de taıaý. Argentınalyq mal ósirýshiler bizdiń buqalardy satyp alǵylary keledi. Olar bul tuqymǵa erekshe qyzyǵýshylyq tanytyp otyr. Sóıtip, Qazaqstannyń mal sharýashylyǵynyń álemdik elıtadaǵy ornyn qaıtaramyz», - dedi kásipker.
