ShQO-da Qazaqstan halqynyń birligi kúnine arnalǵan onlaın kontsert ótti
ÓSKEMEN. QazAqparat – Shyǵys Qazaqstan oblysynda Qazaqstan halqynyń birligi kúnine oraı onlaın kontsert uıymdastyryldy, dep habarlaıdy QazAqparat tilshisi.
Óńirdegi Qazaqstan halqy Assambleıasynyń músheleri, oblystyq etnomádenı birlestikter men Dostyq úıi-qoǵamdyq kelisim ortalyǵy halyqtyń bereke-birligin nyǵaıtýǵa zor úles qosyp keledi.
«Karantın kezinde bos otyrǵan joqpyz. Áriptesterimiz ulttyq taǵamdardy ázirlep úıretý úshin aspazdyq sheberlik synyptaryn uıymdastyrdy. Beınerolıkter arqyly halyqty quttyqtap, jyly lebizderin bildirdi. 1 mamyr kúni ártister onlaın rejımde kontsert ótkizdi. Onda ulttyq bıler men halyq ánderi oryndaldy. Kontsertti oblys turǵyndary ǵalamtor arqyly tamashalady. Jalpy bizdiń kontsert uıymdastyrýdaǵy basty maqsatymyz – qazaq halqyna alǵys aıtý», – dedi ShQO-daǵy ázirbaıjan etnomádenı birlestiginiń tóraǵasy Elvın Demırchıev.
Onlaın kontsertte Qazaqstan halqy Assambleıasynyń múshesi Leo Shık, «Vaınah» sheshen-ıngýsh etnomádenı birlestiginiń tóraǵasy Tatıana Kagermanova, «Aq nıet» folklorlyq ansambliniń jetekshisi Maıra Mýrsalımova jáne taǵy basqalar aqjarma tilekterin aıtty.
«Qazaqstanda turatyn barlyq ult ókilderi bir-birin qurmetteıdi. 1 mamyr biz úshin erekshe mereke. Ansambl músheleri qazaq, belarýs jáne aǵylshyn tilderinde án shyrqaımyz», - dedi «Garmonııa» belarýs vokaldyq tobynyń kórkemdik jetekshisi Natalıa Kýznetsova.
