ShQO-da Qazaqstan halqy Assambleıasynyń XXX sessııasy ótti
ÓSKEMEN. KAZINFORM – Shyǵys Qazaqstan oblysynda Qazaqstan halqy Assambleıasynyń XXX sessııasy ótti.
Óskemende ótken Qazaqstan halqy Assambleıasynyń XXX sessııasyna Assambleıa tóraǵasynyń orynbasary, Prezıdent ákimshiliginiń Qazaqstan halqy Assambleıasy hatshylyǵynyń meńgerýshisi Marat Ázilhanov pen Shyǵys Qazaqstan oblysynyń ákimi Ermek Kósherbaev qatysty.
«Prezıdent Qasym-Jomart Toqaev atap ótken Táýelsizdik jáne otanshyldyq, birlik pen yntymaq, ádildik jáne jaýapkershilik, zań men tártip, eńbekqorlyq pen kásibılik, jasampazdyq pen jańashyldyq – barsha qazaqstandyqqa ortaq qundylyq. Assambleıa – jalpyulttyq biregeılikti nyǵaıtýda mańyzdy ról atqarady. Álemde balamasy joq, konstıtýtsııalyq mártebesi bar biregeı qurylym elimizdegi barsha etnosty bir shańyraq astynda biriktirip otyr. Memleket basshysy aıtqandaı, biz tek ortaq kúsh-jigerimizben bolashaq jetistikterdiń senimdi irgetasyn qalap, saıasatta, ekonomıkada, mádenıet pen qoǵamda túbegeıli ózgeristerdi júzege asyra alamyz», - dedi oblys ákimi.
Sońǵy eki jylda Dostyq úıleri etnomádenı birlestikterdiń ǵana emes, jergilikti qaýymdastyqtyń, úkimettik emes uıymdar men jastardyń ortasyna aınaldy.
«Olardyń qyzmeti shekaralas aımaqtarda erekshe mańyzǵa ıe. Degenmen, monoetnıkalyq aımaqtardyń ózinde olar etnosaralyq turaqtylyqty nyǵaıtý, jastardy tárbıeleý, shyǵarmashylyq bastamalardy damytý jáne mádenı murany nasıhattaý baǵytynda dáıekti jumystar atqarýda», - dedi Ermek Kósherbaev.
Búginde oblysta Dostyq úıleriniń jumysyn jaqsartý baǵytynda aýqymdy jumystar atqarylýda. Jalaqyny kóterýge, túrli is-sharalar ótkizýge jáne materıaldyq-tehnıkalyq bazany nyǵaıtýǵa qosymsha qarajat bólingen.
«Shyǵys Qazaqstan dostyq pen kelisimniń qadir-qasıetin biledi. Bul sózderdi oblystaǵy QHA músheleriniń sý tasqynynan zardap shekken óńirler turǵyndaryna gýmanıtarlyq kómek jınaýǵa belsene qatysýy rastady. Bir ǵana Assambleıa arqyly oblys 140 tonnadan astam júk jóneltti. Sizderde kóptegen biregeı jobalar men ıdeıalar bar. Olardyń qatarynda Dostyq úıindegi medıatsııa kabınetteri, mekteptegi QHA, «Qonaqjaı otbasy» jobalaryn erekshe atap ótýge bolady. Shyǵys Qazaqstanda 8 Dostyq úıi bar – elimizdegi basqa esh aımaqta mundaı jerde joq!» - dedi Qazaqstan halqy Assambleıasy tóraǵasynyń orynbasary Marat Ázilhanov.
Dostyq úıleri búginde oqý-tárbıe, mádenı-aǵartý jumystaryna qatysýda. Oblystyń qalalary men aýdandarynda til úıretýge arnalǵan 25 úıirme jumys istep tur. Qazaq tilin tegin oqytatyn 100 ortalyq ashý josparlanýda.
Sessııa barysynda óńirdiń birligi men yntymaǵyn saqtaý men damytýǵa úles qosqan, sý tasqynynan zardap shekkenderge kómektesýde jáne basqa da túrli is-sharaǵa belsene atsalysqan turǵyndarǵa Qazaqstan halqy Assambleıasynyń «Alǵys» belgileri men Alǵys hattary tabys etildi.
Sondaı-aımaq basshysy Ermek Kósherbaevtyń tapsyrmasymen satyp alynǵan jańa shaǵyn avtobýstyń kilti Assambleıanyń Shyǵys Qazaqstan oblysyndaǵy ókilderine tabys etildi.
