ShQO-da Qazaqstan azamattyǵyn alǵysy keletinder testileýden ótedi

ÓSKEMEN. KAZINFORM – Shyǵys Qazaqstan oblysynda 11 qyrkúıekte QR azamattyǵyn alǵysy keletin sheteldikter men azamattyǵy joq adamdar testileýden ótedi.

Tirkeý 2-10 qyrkúıek aralyǵynda app.testcenter.kz platformasynda júrgiziledi.

Testileý úsh negizgi baǵytty qamtıdy. Atap aıtqanda, qazaq tili boıynsha bilim deńgeıi, Konstıtýtsııa negizderi jáne el tarıhy. Ár tapsyrmada tórt jaýap nusqasy berilgen, olardyń tek bireýi ǵana durys.

Eń joǵary upaı – 100 ball. Testi sátti tapsyrý úshin ár bólim boıynsha belgilengen eń tómengi mejeden ótý qajet: qazaq tili – keminde 15 ball, Konstıtýtsııa negizderi – 20 ball, Qazaqstan tarıhy – 15 ball.

Emtıhan tapsyrý ýaqyty – 2 saǵat 10 mınýt. Múgedektigi bar azamattarǵa qosymsha 30 mınýt beriledi.

- Bul emtıhan – jaı ǵana bilim synaǵy emes. Ol Qazaqstanǵa qadam basý, eldiń qundylyqtaryn qabyldaýǵa, Konstıtýtsııasyn qurmetteýge jáne memlekettik tildi meńgerýge daıyn ekeniniń belgisi, – dep habarlady ShQO Polıtsııa departamentiniń kóshi-qon qyzmeti basqarmasynan.

Testileý nátıjesi boıynsha qatysýshylardyń jeke kabınetterinde elektrondy sertıfıkat qoljetimdi bolady.

Eske salsaq, osyǵan deıin sheteldik azamatpen nekege turý úshin qandaı qujattar qajettigi jaıly jazǵanbyz.