ShQO-da qazaq kúresinen álemdik Gran-prı týrnıri bastaldy
ÓSKEMEN. QazAqparat - Shyǵys Qazaqstan oblysynda qazaq kúresinen Yrǵyzbaı Doshanuly atyndaǵy 6-ynshy halyqaralyq týrnır bastaldy, dep habarlaıdy QazAqparat vksport.kz saıtyna silteme jasap.
Tarbaǵataı aýdanynyń Aqsýat aýylynda bastalǵan doda álemdik Gran-prı deńgeıinde ótýde. Oǵan 22 eldiń balýandary jınaldy. Olardyń arasynda Qazaqstan, Germanııa, Belgııa, Chehııa, Polsha, Qytaı, Mońǵolııa jáne ózge de memleketterdiń sportshylary bar. Qatysýshylar 80 kelige deıingi salmaqta jáne «túıe balýan» atalatyn absolıýtti salmaq sanatynda synǵa túsýde.
Qazaqsha kúres byltyr Azııa oıyndarynyń tizimine engizilgennen keıin álemniń túrli elderinde bul sport túrine degen qyzyǵýshylyq artty. Sondyqtan atalmysh týrnırge qatysýǵa nıet bildirgender sany da kóbeıgen. Jarys ekinshi jyl qatarynan álemdik Gran-prı deńgeıinde ótýde. Qazaq kúresinen bólek munda, sondaı-aq at sportynan týrnırler ótýde - kókpar, báıge jáne alaman báıgeden.
