ShQO-da qaıyq aýdarylyp, jas jigitter sýǵa ketti
SEMEI. QazAqparat – Shyǵys Qazaqstan oblysyndaǵy Buqtyrma sý qoımasyna eki jigit batyp ketti, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, búgin tańerteń qutqarýshylarǵa Buqtyrma sý qoımasynda qaıyq aýdarylyp, eki azamattyń batyp bara jatqany jaıly habar túsken. TJM mamandary oqıǵa ornyna kelip jetkenshe 22 jastaǵy jigitter sýǵa batyp ketken.
«Bireýiniń denesin sol mańaıda bolǵan kýágerler alyp shyqsa, ekinshisiniń máıitin súńgýirler tapty. Qaıyqpen serýendeýge shyqqan er adamdar jaǵadan tym alys ketip qalǵan. Kenetten qaıyq aýdarylyp túsip, qaıǵyly jaǵdaı oryn aldy. Jyl basynan beri óńirimizde 16 adam sýǵa ketti», - dep habarlady vedomstvo ókilderi.
Osy rette, qutqarýshylar turǵyndarǵa sýda shomylý erejeleri men qaýipsizdik sharalaryn qatań saqtaý qajettigin eskertedi.
