ShQO-da qaıtys bolǵan eki donor birneshe naýqastyń ómirin saqtap qaldy
ÓSKEMEN. KAZINFORM — Óskemende úsh kún ishinde eki mýltıaǵzalyq donorlyq ota júrgizildi. Qaıtys bolǵan eki donordyń arqasynda birneshe naýqasqa transplantatsııa jasaldy.
Eki otaǵa da birneshe medıtsına mamandary jumyldyryldy. Birinshi jaǵdaıda donorlyqqa júrek pen baýyr alyndy. Arada birneshe kún ótken soń dárigerler júrek, baýyr, ókpe jáne eki búırekti alý boıynsha taǵy bir mýltıaǵzalyq ota jasady.
Barlyq aǵza Biryńǵaı kútý paraǵynda turǵan naýqastarǵa arnaldy. Olar Astana men Almatydaǵy respýblıkalyq transplantatsııa ortalyqtaryna jetkizildi. Osyndaı otalarda ár saǵattyń mańyzy zor.
— Donorlyq protsesterdiń árqaısysynyń artynda reanımatologtar, transplantologtar, hırýrgter, úılestirýshiler, meıirgerler jáne basqa da medıtsına qyzmetkerlerinen quralǵan mamandar tobynyń táýlik boıǵy eńbegi tur. Aǵzalar barynsha qysqa merzim ishinde alynyp, transplantatsııa ortalyqtaryna jetkizilýi kerek, — dep habarlady ShQO densaýlyq saqtaý basqarmasynyń baspasóz qyzmetinen.
Óskemennen alynǵan aǵzalar Astanadaǵy University Medical Center men Ulttyq ǵylymı onkologııalyq ortalyqqa, Almatydaǵy A. N. Syzǵanov atyndaǵy Ulttyq ǵylymı hırýrgııa ortalyǵyna jiberildi.
Eske salsaq, osyǵan deıin donor tapsyrǵan qannan ınfektsııa anyqtalǵan jaǵdaıda ne isteý kerek ekenin jazǵanbyz.
