ShQO-da qaıtys bolǵan eki donor 12 qazaqstandyqtyń ómirin saqtap qaldy

ÓSKEMEN. KAZINFORM — Shyǵys Qazaqstan oblysynda bıyl qaıtys bolǵan eki donorǵa mýltıorgandyq transplantatsııa jasaldy. 

Týystarynyń kelisiminiń arqasynda óńirdiń eki turǵyny birden 12 patsıentke, sonyń ishinde balalarǵa da ómir syılady.

Qazir Qazaqstanda transplantatsııa kezegin kútip turǵandar tiziminde 4,5 myńnan astam adam bar. Al Shyǵys Qazaqstan boıynsha 232 patsıent, onyń ishinde 7 bala aǵzasyn almastyrýdy kútip otyr. Degenmen donorlyqqa kelisim alý qıyndap barady. Óńirde 6 myńnan astam turǵyn resmı túrde bas tartqan, al kelisimin bildirgender sany bar-joǵy — 360 adam.

— Bıyl 5 potentsıaldy donor anyqtaldy, olardyń tek ekeýiniń týystary ǵana kelisim berdi. Sonyń arqasynda 12 qazaqstandyqtyń ómiri saqtaldy, - dedi ShQO óńirlik transplantkoordınator Aslan Nurǵalıev.

Ol elimizde jeke múddeni boldyrmaıtyn kópsatyly qorǵanys júıesi jumys isteıtinin atap ótti.

— Retsıpıentter týraly aqparat qupııa saqtalady. Patsıentterdi irikteýdi kompıýter júrgizedi, úılesimdilikti de sol tekseredi, - dep túsindirdi A.Nurǵalıev.

Potentsıaldy donorlar týraly aqparat tek «mı ólimi» dıagnozy rastalǵannan keıin jarııalanady. Bul — mı men onyń barlyq qurylymynyń qyzmetiniń tolyq ári qaıtymsyz toqtaýy.

— «Mı ólimi» dıagnozyn dárigerler konsılıýmy qoıady. Sol sátten keıin adam aǵzasy biraz ýaqyt apparattyq qoldaýda bolady. Dál osy kezeńde organdardy transplantatsııalaýǵa múmkindik týady, - dedi maman.

Transplantatsııanyń eń kúrdeli tusy — otbasynyń kelisimi. Qıyn sátte sheshimdi týystary qabyldaıdy. Alaıda ár azamat óz erkin aldyn ala eGov.kz portalynda bekitip alady.

— Eger adam tiri kezinde óz ustanymyn kórsetken bolsa, týystardan qosymsha ruqsat alynbaıdy. Dárigerler marqumnyń erkine sáıkes áreket etedi, - dedi transplantkoordınator.

Eske salsaq, osyǵan deıin Almatyda bir donor 4 adamnyń ómirin saqtap qalǵany habarlanǵan.