ShQO-da qaıta paıdalanýǵa bolatyn medıtsınalyq maskalar shyǵarylmaq
ÓSKEMEN. QazAqparat – Shyǵys Qazaqstan oblysynda qaıta paıdalanýǵa bolatyn medıtsınalyq maskalar shyǵarý qolǵa alynýda, dep habarlaıdy QazAqparat.
Bul jaıly oblystyq Kásipkerlik jáne ındýstrıalyq-ınnovatsııalyq damý basqarmasynyń basshysy Erjan Shurmanov málim etti. Aımaq basshysynyń tapsyrmasy boıynsha dákeden jasalǵan medıtsınalyq maskalar shyǵarý jumystary bastalǵan.
«Óńirdegi jeńil ónerkásip kásiporyndary osyndaı ónimderdi qalaı shyǵarý kerektigin meńgerdi. Búgingi tańda oblystaǵy farmatsevtıkalyq kompanııalardyń qoımalarynda medıtsınalyq dáke qory jetkilikti. Osynyń nátıjesinde qysqa ýaqyt ishinde mıllıon danaǵa deıin qaıta paıdalanýǵa bolatyn maskalar jasaı alamyz», - deıdi ol.
Basqarma basshysynyń aıtýynsha, osyndaı medıtsınalyq maskalardy sertıfıkattaý jumystary júrgizilýde. Olar dárihanalarda satylatyn bolady. Bir maskanyń baǵasy 60 teńgeni quramaq.
