ShQO-da qaıyrymdylyq kúninde qandaı sharalar ótkizildi
ÓSKEMEN. KAZINFORM - Shyǵys Qazaqstan oblysynda qaıyrymdylyq kúninde birqatar shara ótkizildi.
Zaısan aýdanyna qarasty Qaratal aýylynda 6 kópbalaly otbasy men Qarabulaq aýylynda 7 otbasy jańa baspananyń kiltin aldy. Jalpy aýdany 91 sharshy metrdi quraıtyn tórt bólmeli úıler «Birqabatty Shyǵys» baǵdarlamasy boıynsha salynǵan.
- Aýdan ortalyǵynan 25 shaqyrym jerde ornalasqan Qaratal – aýdandaǵy eń iri eldi meken. Halyq sany úsh myńǵa jýyq. Turǵyn úıge muqtaj kópbalaly otbasylar tórt-alty balaǵa deıin tárbıelep otyr. Jalpy Zaısan aýdanynda «Birqabatty Shyǵys» baǵdarlamasy boıynsha 42 turǵyn úı salynǵan. Búgin Qarabulaq aýylynda kópbalaly otbasylarǵa jeti úıdiń kiltin tabystadyq. Bul baǵdarlamany júzege asyrý jalǵasady. Aýdanda alpystan astam turǵyn úı salý josparlanýda, – dedi aýdan ákimi Aelıta Ahmetsálimqyzy.
Shemonaıha aýdandyq bilim bóliminiń mamandary jalǵyzbasty qarttardy aralady. Zeınetkerlerge aýdan basshylyǵy atynan Alǵys hattar men syılyqtar tabys etildi.
- Búginde bul mereke kópultty Qazaqstanda turatyn barlyq halyqtar úshin birdeı qymbat. Osyndaı ıgi, shynaıy, meıirimdi isterdiń jastar úshin máni tereń. Mundaı amaldar adamdardy qurmetteýge, janashyrlyqqa, súıispenshilikke tárbıeleıdi», - deıdi aktsııaǵa qatysýshylar.
Úsh kún ishinde barlyǵy 40-tan astam qarııany quttyqtaý josparlanýda.
Óskemende «Dástúr men ǵuryp» jobasy aıasynda jáne Naýryznama merekesine oraı qazaq halqynyń ulttyq brendi – baýyrsaqtyń túrlerin nasıhattaý maqsatynda «Aq baýyrsaq» merekesi men «Baýyrsaq-FEST» festıvali uıymdastyryldy.
Shaı baýyrsaq, shı baýyrsaq, jol baýyrsaq, maı baýyrsaq, kespe baýyrsaq , ashyǵan baýyrsaq, jol baýyrsaq, irimshikti baýyrsaq, barmaq baýyrsaq, jáı baýyrsaq túrleri kórsetildi. Qatysýshylar halyqty baýyrsaqtyń alýan túrliligi men san túrli jasalý jolymen tańǵaldyrdy.
Budan bólek, qaladaǵy kolledj stýdentteri Dostyq úıi-Qoǵamdyq kelisim ortalyǵynyń janyndaǵy alańdy retke keltirdi.
«Tazalike» aktsııasy sheńberinde stýdentter ortalyq janyndaǵy alańda qar men qoqysty jınaýǵa belsene at salysty. Jobany ShQO «Amanat» partııasy janyndaǵy «Jastar rýhy» jastar qanatynyń fılıaly uıymdastyrdy.
