ShQO-da qaıyqtan qulap ketken adamnyń denesi tabyldy

ÓSKEMEN. KAZINFORM –  Shyǵys Qazaqstan oblysy Marqakól aýdanynda qaıyqtan qulap ketken adamnyń denesi oqıǵa ornynan 13 shaqyrym jerden tabyldy.

«112» arnasyna habarlasqan adam Marqakól mańyndaǵy Qaljyr ózeninde adamnyń joǵalyp ketkenin aıtty.

Belgili bolǵandaı, rezeńke qaıyqpen ózende júzip kele jatqanda qaıyq aýdarylyp, 1956 jylǵy er adam sýǵa qulap ketken. Soǵan baılanysty jedel izdestirý shtaby qurylyp, izdeý aýmaǵy tórt ýchaskege bólindi.

Jumystar qurlyqta, sýda jáne drondardyń kómegimen júrgizildi. Alaıda Qaljyr ózeniniń qatty aǵysy, jartasty, qoljetimsiz taýly aımaq izdestirý jumystaryn qıyndatty.

- Er adamnyń máıiti Marqakól mańyndaǵy Qaljyr ózeninen oqıǵa ornynan 13 shaqyrym jerden tabyldy. Іzdeý jumystaryna qutqarýshylar, polıtseıler jáne orman sharýashylyǵy qyzmetkerleri jumyldyryldy. Ol rezeńke qaıyqpen júzip kele jatyp, ózenniń qatty aǵysyna tótep bere almaı, sýǵa ketken, - dep habarlady ShQO TJD baspasóz qyzmetinen.

Eske salsaq, osyǵan deıin Qostanaı oblysynda 10 jastaǵy bala sýǵa batyp ketkeni habarlanǵan.