ShQO-da qaıyǵy aýdarylyp qalǵan 2 balyqshy qutqaryldy

Shyǵys Qazaqstan oblysy Kúrshim aýdanynda qaıyǵy aýdarylyp qalǵan 2 balyqshy qutqaryldy, dep habarlaıdy Kazinform.

ShQO Tótenshe jaǵdaılar departamenti baspasóz qyzmetiniń málimetine súıensek, Kúrshim aýdany Buqtyrma sý qoımasyndaǵy «Qyzyl tý» parom ótkeliniń janynda 57 jáne 67 jastaǵy eki balyqshy qaıyqpen kele jatqan. Kenet qatty soqqan jeldiń saldarynan rezeńke qaıyqtary aýdarylyp qaldy. 

«Jaqyn jerde bolǵan parom qyzmetkerleri, basqarýshy Qadylbek Jarmuhambetov, kapıtan Serik Dúketaev, mehanık Aleksandr Ýstınov, motorıst Kaharman Ábikenov, matros Lıýdmıla Kroıýkova jáne elektrık Oqasov Qudaıbergen qutqarýshylar kelgenge deıin balyqshylarǵa qutqarý sheńberin laqtyryp, sýdan alyp shyqty. Er adamdarǵa medıtsınalyq kómek qajet bolmady. Jaǵalaýǵa jetkennen keıin olar jeke kólikterimen Altaı qalasyna baǵyt aldy», - delingen aqparatta.

Osy rette, oblystyq TJD qyzmetkerleri balyqshylardy qaýipsizdik sharalaryn qatań saqtaýǵa shaqyrdy.