ShQO-da qaýipti jol ýchaskelerine LED-ekrandar ornatyldy
ÓSKEMEN. QazAqparat – Shyǵys Qazaqstan oblysynda joldaǵy qaýipti ýchaskelerge LED-ekrandar ornatyldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, júrgizýshilerdiń jol júrisi qaǵıdalaryn saqtaýy jáne jol-kólik oqıǵalarynyń aldyn alý maqsatynda qaýipti ýchaskelerge bes LED-ekran ornatyldy.
«Onda júrgizýshiler eldi mekenderden shyǵar aldynda joldardyń jaı-kúıi men aýa raıy týraly sońǵy aqparattarmen tanysa alady. LED-ekrandar «Óskemen – Altaı», «Omby – Maıqapshaǵaı», «Óskemen – Rıdder» tasjoldaryna qoıylǵan», - delingen habarlamada.
Ótken aıda óńir aýmaǵynda 64 jol apaty tirkelgen. Sonyń saldarynan 12 adam kóz jumyp, 82 adam túrli dene jaraqattaryn aldy.
Osy rette, ShQO polıtseıleri joldardyń jaı-kúıi týraly aqparatty táýlik boıy oblystyq PD jergilikti polıtsııa qyzmeti basqarmasynyń kezekshi bóliminen (77-60-05 baılanys nómiri arqyly) jáne «Qazavtojol» JShS-dan (telefon nómiri: 26-28 -08), «Oblysshyǵysjol» JShS-dan (telefon nómiri: 57-42-52) bilýge bolatyndyǵyn eskertedi.
