ShQO-da qatty jel qus fabrıkasynyń shatyryn ushyryp áketti
ÓSKEMEN. QazAqparat - Shyǵys Qazaqstan oblysy Glýbokoe aýdanynda qatty jel qus fabrıkasy ashanasynyń shatyryn ushyryp áketti, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 20 naýryz kúni Glýbokoe aýdanynda sekýndyna 16 metr jyldamdyqpen jel soǵyp, Predgornoe aýylynda ornalasqan qus fabrıkasy ashanasynyń shatyryn ushyryp jibergen.
«Ǵımarattyń jalpy aýdany 680 sharshy metr. Zardap shekken eshkim joq. Oqıǵa ornynda komıssııa músheleri jumys isteýde», - dep habarlady vedomstvo ókilderi.
Aıta keteıik, osyǵan deıin TJD mamandary óńir jurtshylyǵyna daýyldy eskertý jasaǵan bolatyn.
Qandaı da bir qıyndyqqa tap bolǵan jaǵdaıda «112» nómirine habarlasý qajet.
