ShQO-da qatty jelden kópqabatty úıdiń qasbeti opyrylyp tústi

Shyǵys Qazaqstan oblysy Zaısan aýdanynyń ortalyǵynda qatty jelden kópqabatty úıdiń qasbeti opyrylyp tústi, dep habarlaıdy Kazinform.

Shyǵys Qazaqstanda kesheli beri daýyl soǵyp tur. Mysaly, Zaısan qalasynda jyldamdyǵy sekýndyna 26 metrge deıin jetetin jel saldarynan Spambetov kóshesindegi besqabatty úıdiń qasbeti opyrylyp tústi. Áýbákirov saıabaǵyndaǵy aǵashtar da qulady.

«Úıdiń syrtqy qaptamasyn qalypqa keltirý jumystary shuǵyl qolǵa alynady. Merdiger bul jumysty osy aptanyń sońyna deıin aıaqtaýdy kózdep otyr. Sondaı-aq qulaǵan aǵashtar alynyp, saıabaq ishi tazartylady», - dep habarlady Zaısan aýdanynyń ákimdiginen.

Budan bólek, Rıdder qalasynyń kóshelerindegi jarnama taqtaıshalaryn ushyryp áketken jel aǵashtardy da qulatyp jatyr. Soǵan oraı qalalyq bilim bólimi birinshi aýysymdaǵy bastaýysh synyp oqýshylaryn sabaqtan bosatý týraly sheshim qabyldaǵan. Al ekinshi aýysymda oqıtyn balalar ádettegideı mektepke bardy.

Óskemende de jel ekpini qatty. Osyǵan baılanysty memlekettik rámizder taýyndaǵy tý búlinip qalmas úshin tómenge túsirildi.

Bul rette, ShQO Tótenshe jaǵdaılar departamenti 24 qazanda da jeldiń basylmaıtynyn málim etti.

Oblystyń soltústiginde, shyǵysynda, ońtústiginde jel ekpini sekýndyna 15-20 metrge jetpek.