ShQO-da qatty jelden birneshe aýyl jaryqsyz qaldy

ÓSKEMEN.KAZINFORM — Shyǵys Qazaqstan oblysynda aýa raıy kúrt buzyldy. Qatty jelden aýyldar jaryqsyz qalyp, borannan jol apattary jıilep ketti.

Óńirde sońǵy kúnderi aýa raıy short buzyldy. Keshe qarly borannan joldar birinen soń biri jabylyp, jol apattary da kúrt kóbeıgen.

— Avtokólikterdiń Osınov jáne Ómesh asýlarynan jyraǵa qulap ketýi jıi tirkeldi. Sondaı-aq Óskemen-Rıdder, Óskemen-Shemonaıha, Óskemen-Tarǵyn-Samar tasjoldarynda jol-kólik oqıǵalary kóp boldy. Qatty boran men joldyń durys kórinbeýi saldarynan kólik qozǵalysy shektelip te jatyr. Abyroı bolǵanda, osy demalys kúnderi óńirde iri jol apaty bolǵan joq, — dep habarlady ShQO polıtsııa departamentinen.

Al Kúrshim aýdanynda qatty jelden elektr jelisi úzilip, birneshe aýyl jaryqsyz qalǵan. Solardyń ishinde aýdan ortalyǵy — Kúrshim aýyly da bar. Jergilikti ákimdiktiń málimetinshe, qazir qalpyna keltirý jumystary júrgizilip jatyr.